Faamanatu le lima tausaga o Levei Molioo i Kalaiesetete
“Afai e le atinae e Ieova le fale e galulue fua o e atina‘e”, o nisi o upu sa faamamafaina e le susuga i le Toeaina, Tumama Vili i le lotu faafetai o le faamanatuina o le lima tausaga o Levei Molioo ua aulia fiafia lea sa faataunuuina i le Garden Restaurant i le aso 28 Me 2011.
E pei ona toe fagufagu le Toeaina, o le fale o le gagana a le faisalamo i le tausia o lona aiga, o lana fanau ma faafetaia ai le Atua, o mātua ma o la aiga uma i le tausia lelei o se alo faasino i le mamalu o aiga ga lua.
O se tasi o meaalofa a le mafui‘e ua iloa ai le tāua o le ola, tāua o fanau aemaise aiga, sa tele ina manatu māmā i fanau ae ua avea le mafui‘e ma ala e fusia faatasi ma lalago faatasi.
O Levei Molioo o le ulumatua a ona mātua o Fetalaiga Mark ma Line Molioo (Lotofaga, Salelologa & Papa Sataua), o le tamai olive mai le EFKS Wooston, o se alo foi faasino i le afioga Leuluaialii & Levaoalii faapea le fetalaiga Molioo & Menime, na faatasia foi i lea aso le tina matua o Faatagalelei Matafeo na auvasa mamao mai Samoa.
Ina ua mae‘a le lotu faafetai lea sa faatumulia i le mamalu o le ekalesia ma le valaaulia aemaise uo ma paaga laiti a Levei, o le fetalaiga Molioo na tali fuaitau e faafetaia le susuga i le Toeaina e tusa ma le sauniga faafetai o le afafine, ma faagasolo loa le polokalame.
Mamafa le taumafataga na saunia, na pule lava le tagata ia pe alu faafia e tului lana taumafa, aemaise nai fanauiti ua saoloto faasoloatoa ma fiafia i lea aso, ma se‘i tau faagalo atu ai luluga faalausosoo a le aai maluelue.
E molimauina tapenaga o le aso fanau e pei o le keke matagofie ua fausia o se fale ma ona pou e lima foliga mai o se tuugalamepa.
Tau ia ina ia mumū le lamepa i laasaga o lona olaga, o fanau ia tutupu i le Talalelei ma avea ma taitai faamanuiaina.
Talu ai o pelega o fanau, o le fetalaiga Sita Faalele Toalii (Lotofaga), sa lauama tootoo e faafetaia le mamalu o le valaaulia ma faapea ona saunia nai meaalofa teutusi mo le aufaigaluega, Rev Tumama & faletua Elisapeta Vili, faapea le tausi matagaluega Rev Ale Palelei aemaise susuga i a‘oa‘o, tiakono ma nai toeaiina sa auai.
O le susuga i le tiakono Toonai Tafea na saunoa faafetai e tusa ai ma faaaloaloga na alo i ai le mamalu o le aiga aemaise tulaga uma o le aso fiafia. Na mae‘a lea ona faaiu lea o faamoemoega uma i le Atua i le tatalo na saunia e le susuga i le taitai.
O fanau o le anofale o aiga, o i latou foi o tamai olive e vagavagaia le laoai. Ia manuia tele lou aso fanau Levei Molioo aemaise lou ulufale atu i lau aoga fou St Pauls School.
