Ua mae‘a le fa vaiaso muamua sa faagasolo ai le polokalame o faamalositino a le Ekalesia Faapotopotoga a le Atua i Papaptoetoe, le susuga i le Faafeagaia ia Keti ma le faletua ia Palepa Ualesi.
E ta‘i fa masina ma faia le tuufaatasiga, ma o piliota faaletausaga foi ia ua veavaeina i ai e le komiti faafoe o lea polokalame tāua a le aulotu, le faagaioiga ina ia maua se faasiliga malosi mo tagata uma o le ekalesia.
Na faaalia manino e le susuga i le taitai komiti o faamalositino, le susuga ia Magele Filemoni e faapea, ua vaaia i le taimi nei se suiga tele i lea foi poloketi a le aulotu.
O ia suiga ua faamaonia ai, le faatupulaia o le fiafia ma le naunau i le toatele e lagolago faamalositino.
O le isi tulaga sa saunoa i ai Magele, ona e faapea e fai lava si tetele o faailoga ma taui o loo ofoina mo i latou o le a tele se mamafa e toesea mai o latou mamafa masani.
O se faiga faatauvaga lea, ua maoae lona aogā tele, ma le faaosofia ai o lagona fia auai o le toatele.
E lē gata i lea, a o le finagalo fia maua pea e tagata o le soifua maloloina, ma le soifua manuia e maua ona o le galuega a le faamalositino. O ia vaega uma ua ofaatasi, ma galulue faatasi mo le unaia ma le faatosinaina o le mamalu o le ekalesia ina ia auai ma faaaogā avanoa tāua.
O le tamā ia Mulitalo Pasefika Malu, sa ia mauaina le tulaga muamua o le piliota muamua e pei ona sa lauina togi i le Aso Toonai, aso 14 o le masina lenei o Me.
O le tauvaga ma le laugatogi sa faatatau ma fitoitonu mo le tagata sa maualuga ma tele ona kilo e aveesea pe lusi foi. O le tamā na manumalo, sa pa‘ū ona kilo e 25 mai le luaselau ma ona tupu sa iai.
O Sina Tuumatavai na maua le tulaga lua, o Vaitui Mathew sa tulaga tolu, a o Masoe Ponamua sa tulaga fa, ma le alii o Lofi Tuala sa ia mauaina le tulaga lima. Ua toe amata nei le piliota lona lua, poo le isi fa masina sosoo ai, ona toe faia ai lea o le isi laugatogi e pei ona fuafuaina e le komiti galulue.
O le susuga ia Magele Filemoni, o Fonoti Leu Scott, Siitu Tafili, Lemi Pitone ma Evangeline Lilomaiava o le komiti faafoe lea o loo nafa ma le vaaia ma le faatautaia o lea foi polokalame aogā a le aulotu.
Sa ta‘ua e Magele e faapea, e momoli foi le agaga faafetai o le komiti ma le aulotu i le susuga ia Keti o le Tamā faaleagaga ma le faletua ia Palepa, ona o le avanoa sa tatalaina ane mo lea foi poloketi tāua e faia i totonu o taimi ma faatulagaina foi o se gaioiga mo le ekalesia atoa.
O le galulue faatasi o le tino o le Alii i soo se matata aogā e penefiti ai tagata uma, e tāua tele ma o se faailoga lea o le fesoasoani pea, ma molimauina o le finagalo o le Atua. E tatau lava ona maloloina le tino, ma e maloloina ai foi ma le mafaufau, ae o le a sili ai ona gaoioi manuia le agaga, e pei ona talitonu i ai le susuga i le taitai komiti o le faamalositino, le susuga ia Magele Filemoni.
E tele faailoga sa tauaaoina e le komiti mo i latou sa manumalo pito i luga, ma o le a faapea foi le isi fa masina o muamua. E iai isi faailoga sa fesoasoani ane ai nisi o kamupani ma pisinisi, ona o le lagolagoina o le auga ma le faamoemoe o le polokalame.
O le a toe maua se isi tala lata mai o lea foi polokalame i le isi fa masina o lumanai, pe a mae‘a ona tuufaatasia lipoti a le komiti mo le piliota o muamua.
