O fea lava se tulutulu ma se itulagi o tapuai ai le Kerisiano moni, e tasi lava le ‘auga ma le faanaunauga, ia maua le lagi ma le ola e faavavau, auā e lē o so tatou nuu moni lenei lalolagi ua na o le fesouaina i puapuaga ma faigata, ae toomaga mea uma pe a latalata le soifua auauna i le Atua.
E tuli lava le ‘ai o le tagata ia i le taufetuliga o faia nei, auā e tutū taitoatasi lava i le aso faamasino ma le seleselega.
E ui lava ina va i maila e fia ma mamao nofoaga e faatasia ai le fanau a le Atua, ae lē mafai ona faafiti pe solomuli le fia mafuta ma le molimauina o lea faatasiga a le auuso.
E lei manatu māmā le Matagaluega LMS Pasefika a Kuiniselani auā o loo alaala ai le taitai Aoao o le Ekalesia.
Na pei e malaga i se isi atunuu mamao le usugafono a le Ekalesia LMS Pasefika ina ua tauaofai le fonotele i Penrith i Sini Niu Sa Uelese.
Na tatalaina le fonotele i le Aso Tofi, 26 o Me e pei ona tuuvaa atu ai le Matagaluega a Kuiniselani ma nisi o Matagaluega e pei o Niu Sila, Sini, Samoa, ma Melepone faapea Rarotonga, Tokelau ma Korea ua ofi mai i le faamalu o le LMS Pasefika.
Na masii atu ae tapuaia e nisi o le Ekalesia sa lei mafai ona maua avanoa e malaga ai ona o galuega.
O le Komiti Aoao o le Autoeaiina: Taitai – Afoa Alapati Meatuai Tuuga Stevenson, Toeaina ia Rev Keti Maiava (NZ), Toeaina Iafeta Tiuga Melepone (Failautusi), Solomona Iosefa (teuoloa).
Na tatalaina e le matagaluega a Kuiniselani faafiafiaga i le afiafi o le Aso Toonai, ma faagasolo ai fuafuaga o le fonotele. Sa ulimasao le faamoemoe ma iu manuia i le faatasi mai o le Atua.
E 3 ekalesia a Kuiniselani. Taitai: Afoa ma Sarai Meatuai Tuuga, faatasi ma nisi o faafeagaiga e pei o le susuga ia Rev Ioane & Nifo Ioane ma le susuga ia Faatui & Lupe Leapai.
O le auga o aute o lea fonotele ina ia tuufaatasia ai le auuso ma se‘i silafia faagaioiga o tautiga ai tovine e fia i le lalolagi o iai Ekalesia a le LMS Pasefika, ma ua vaaia ai le tupu ma le ola ua iai nei.
Na ‘au-o-manū faagasologa o le mafutaga ma toe taliu mai i fanua i le Aso Sa ua tuanai atu nei.
