Autalavou God of All Grace Ministry i le latou aitema na tatala aloaia ai polokalame o le afiafi

E eseese atunuu e eseese foi gagana ae tasi lava le Atua Soifua o loo auauna iai tagata oi latou o loo iai le faatuatua ma le talitonu i le Atua o Isaraelu. Poo ai lava le atunuu ae ia iloa e le tagata lona vaalauina mai le Atua. O lona uiga ia iloa e le tagata Kerisiano lona tāua i luma o le Atua.

O le sini lea ma le faamoemoe o le polokalame a le autalavou a le ekalesia o le God of All Grace Ministry i Otahuhu o loo faifeau ai le susuga i le faafeagaiga ia Rev Kupa Fui ma le faletua Rouina Fui ia toe tapue ma faailoa i tupulaga talavou lo latou tāua i le vaalauina a le Atua.

E tele autalavou sa valaaulia faatasi ai ma autalavou mai Tonga, aua o le agaga moni lea o le faamoemoe ia taumafai ia momoli lava le talalelei a Iesu Keriso i soo se itu o le lalolagi ina ia iloa e tupulaga talavou e omai faatasi tagata uma i lalo o le faamalu o le Atua ina ia iloa ai le tāua o le talavou i le valaauina a le Atua. 

O le polokalame ua le gata i tupulaga talavou ae ua oo foi i susuga i faafeagaiga ma o latou faletua sa auai aemaise foi o le auvalaaulia sa tumutumu ai le malumalu i Otahuhu e molimauina le sao o talavou ma le faaaogāina o latou olaga i le valaau a le Atua.

O le faamalosi a le susuga i le faafeagaiga ia Rev Glen Anaua sa folafolaina le upu faauuina a le Atua, na ia toe fafagu ma toe tu’itu’i ai i olaga o talavou i totonu o ekalesia, poo fea lava se tovine o loo galue ai, ia mataala i le saoasoa o le soifuaga lea ua iai nei le lalolagi i le faaaogāina o auala faakenekolosi ua faaaogāina nei i lenei vaitaimi. 

O auala ia o loo taumafai le taipolo e gaoia ai le olaga o le talavou mai lona valaaina mai le Atua. Ia mataala ma ia aua nei faasamasamanoa le olaga o le talavou aua o loo fealuai le alii o le lalolagi e gaoi, fasi ma faaumatia le tagata.

O le vaai mamao o le susuga i le faafeagaiga ia Rev Kupa Fui i le lumanai manuia o talavou o loo ia taumafai ai e faaauau pea polokalame faaleagaga e faapitoa mo talavou e faaolaola ma faamalosia ai o latou olaga auauna i le Atua. 

O le tāua foi lea o le polokalame i le afiafi o le aso Sa ua mavae na molimauina ai le fiafia o talavou i le faamalosi a le susuga i le faafeagaiga ia Rev Glen Anaua faatasi ai ma aitema eseese sa suifefiloi ai le faasoaina o le talalelei e Iesu Keriso.

O le aso Sa o lumanai o loo tapena ai le sauniga a le ekalesia a le God of All Grace Ministry e faatinoina ai e tupulaga talavou le sauniga atoa. O le taitaiina o le sauniga faatasi ai ma le laugaina o le upu a le Atua. O le manatu maualuga o le faafeagaiga ia lelei ona faaaupegaina le fanau mo le galuega a le Atua, aua a mavae atu lenei augatupulaga ae o loo iai le isi augatupulaga latou te faaauauina le talalelei a Iesu Keriso.

Ia aua ne’i pei o le taitaiga a Iosua e mavae atu lana ia nofoaiga ae tulai mai tupulaga latou te le iloa le Atua. A lelei ona faaaupegaina ma tapue olaga o fanau talavou i totonu o le ekalesia e umi foi ona iloa e le talavou lona tāua ma le valaauina a le Atua i lona olaga.