E tasi le vaiaso na usuia ai le koneferenisi a le ekalesia o le Samoa Mana of Life i Brisbane Ausetalia ae ua faigata ona faauma ona ua mafanafana le alofa o le Atua sa mafuta ai susuga i faafeagaiga ma o latou faletua faapea ma latou ekalesia.
O le fonotaga e tai lua tausaga ma faataunuu, e moni lava e maua le mafutaga i totonu o ekalesia ae seasea maua se avanoa e mafuta faatasi ai faifeau ma aulotu taitasi e pei o lenei mafutaga.
O le ala foi lea e faamalosi mai ai le afioga a le Atua e faapea ia aua ne’i tuua le mafuta faatasi o le auuso ia Keriso.
O le faletolu o le ekalesia i Aukilani e aofia ai Manurewa o loo faifeau ai le susuga ia Teofilo Leapai ma le faletua ia Finau Leapai o le taitai foi lea o le ekalesia i Niu Sila, o Botany o loo galulue ai le susuga i le faafeagaiga ia Lele Tulua ma le faletua ia Alofa ma Otara o loo faifeau ai le susuga ia Peti Solomona ma le faletua ia Lima Solomona, na malaga uma i Ausetalia faatasi ma sui usufono mai aulotu.
O Brisbane o loo iai le taitai aoao o le ekalesia le susuga i le faafeagaiga ia Kofe Litu ma le faletua ia Tesi ma le susuga i le faafeagaiga ia Toetagata Afu ma le faletua ia Niu. E lima ekalesai o loo i lalo o le faamalu o le Ekalesia o le Samoa Mana of Life, ae o le konefenisi lea sa iloga ona faatupulaia ai le olioli ua totoina e le Atua i loto o tagata e galulue ai i lana galuega. E toaititi ekalesia ae ua iloga le soifua tautua o tagata lolotu ua le gata i totonu o Niu Sila ae oo foi i ekalesia e lua i Ausetalia.
O le susuga i le taitai o Aukilani ia Pastor Teofilo Leapai sa ia tatalaina le koneferenisi i le Aso Sa, ona amata faagasolo lea o polokalame o le vaiaso e ala i sauniga i afiafi o aso taitasi lea sa auauai ai le aufaigaluega e faamalosi ai faatasi ai ma latou fono tatalo i taeao.
O le Aso Faraile sa faapito lea i polokalame a autalavou taitasi e faasoa ai foi le fanau i so latou sao i le galuega a le Atua e ala i aitema.
E maeu foi le faaaogaina o fanau i totonu o le galuega a le Atua i aitema faauuina na saunia.
O le Aso Sa na tapunia ai le mafutaga e le susuga i le taitai aoao o le ekalesia ia Pastor Kofe Litu lea sa ia toe faalauteleina ai le autu o le fonotaga e faapea, “O lenei le au uso e, ia atili ai ona faamalolosi outou, ia faamauina lo outou valaauina ma lo outou filifilia, aua pea outou faia ia mea tou te le iu vale lava (2 Peteru 1:10).”
O le ola vaalaauina o le tagata sa faamamafa iai le saunoaga a le taitai, aemaise ai ia faaleleia totonu o ekalesia o loo galulue ai, ma ia maua e tagata lolotu le ola fiafia ma le saolotoga e tapuai ai i le Atua.
O le luitau ua toe tapena ai le aufaigaluega mo le galuega a le Atua ina ia lelei ona faafailele ma tapue le soifua galulue o tagata lolotu ma ia faamausali ai pea le ola fiafia o tagata e tapuai i le Atua. O le isi lua tausaga o loma nei e toe usuia ai le isi fonotaga ma o Niu Sila lea o lea talimalo ai i lea faamoemoe i le alofa o le Atua.
