Amuia le auauna ua valaau mai lona Matai a’o loo faapea ona galue pea. O le auauna ua fetalai mai lona Atua e ulufale atu ia i le fiafia o lona Alii, i le nofoaga o le malo o le Atua ua saunia mo ē faatuatua ma talitonu i le Atua.
O Rev Fetulima Mika e valaau mai lona Atua o loo galue i le galuega a le Atua i le ekalesia Metotisi o Iesu o le ala i le lagi i Aukilani. Na faamanava e le Atua ana galuega i le aso 16 o Iulai i le tausaga 2019, i se gasegase o lona fatu. O le toa o le talelei a le Atua, o se auauna e tumu i le faatuatua, i mea e lē o vaaia e ona mata. O le ala foi lea e fiafia mai i ai le Atua i lana auauna ona o se tagata e tumau i le faatuatua.
O le masina ua mavae sa malaga ai le susuga i le faafeagaiga ia Rev Fetulima Mika ma lona faletua ia Linda Mika i Isaraelu e asiasi i le nuu paia. Ae ina ua foi mai ae toe taoto ai loa i lona fatu ma oo lava ina valaau mai i ai lona Matai.
A’o lei alu le laua malaga i Isaraelu ma lona faletua sa iai se faatonuga a fomai mo ia e aua ne’i toe malaga mamao, peitai ane sa tumau le faatuatua o le susuga i le faafeagaiga ia Rev Fetulima Mika e alu le malaga ma toe foi mai, e leai se mea e tupu ia te ia. Na sa’o lelei le lagona o le susuga i le faafeagaiga na toe foi filemu lelei mai le malaga e leai se faalavelave sa tupu.
I le molimau a lona afafine ia Joanna e tele ni atunuu o le lalolagi sa malaga ai ma le latou tamā ma e o e galulue faamisionare e pei o Sigapoa, Pakisitani, Atu Solomona, Egelani, Amerika, Ausetalia ma isi atunuu, e alu le malaga ae leiloa poo fea e nonofo ai ae leai foi ni tupe e faatino ai le galuega, e pau le tala a le tamā e faalagolago mea uma i le taitaiga a le Agaga Paia.
O le molimau a le faletua ia Linda Mika e to’aono le laua fanau, ae ua 38 tausaga talu ona faaipoipo ma Fetulima Mika. O le auauna e mata’u i le Atua ma toaga e suesue i le Tusi Paia, e to’a lona loto pe oo mai ni faafitauli i le galuega, ae alofa faamaoni foi i soo se tagata.
E tumu i le loto maualalo toe aga mālie, toe lelei lana kuka. O le luau ma le talo o le meaai lea e fiafia tele i ai. E alofa i tagata o ona aiga faapea ma tagata o le ekalesia, ma e fiafia foi e aumai tagata i lona fale i soo se taimi.
Faamatala e Linda sa iai le po na alu ai Fetulima e momoli le fanau i Hamilton, ae te’i ua se ai lana taavale i le leva o le po. Ae te’i ua tau atu ai Fetulima i le tagata o loo pe lana pasika i le auala, ma ia ofoina ai loa lana taavale e taumafai e tatala pa’u o le pasika ae taumafai e faaofi le pasika i totonu o lana taavale.
O le tea o le 1 i le po lava lea ae te’i le faletua ia Linda ua tutū atu Fetulima ma le tamaloa lea i le latou fale ua susū uma i le mamafa o timuga. O le tamaloa e igoa ia Alexi e sau mai Falani, sa nofo ai loa i le latou fale i le 4 masina.
I le amataga foi o leitio Samoa e lē galo ai le tautua a lea auauna ma lana fanau, e sau lava Fetulima Mika e lagolago le leitio ma aumai lana fanau ona afafine e toatolu le Mika Sisters, o Pricilla, Joanna ma Rachel e pepese i luga o le leitio a’o iai le ofisa faasalalau i Mt Eden. E ta lana kitara ae pepese lana fanau i le taeao poo po o Aso Toonai e fai ai fono tatalo a susuga i faifeau ma taitai o le atunuu i le maota o Samoa i K.Rd.
O le tele o polokalame faalelotu e fiafia tele le susuga ia Rev Fetulima Mika e auai, e pei o le mafutaga a faifeau, o le Tama Tane Malosi faapea ai ma le polokalame i luga o le leitio le Tuutuu le upega i le loloto lea e galulue ai ma le susuga i le faafeagaiga ia Poni Fonoti.
Saunoa le susuga ia Rev Poni Fonoti e ono tausaga o galulue faatasi ma Fetulima Mika i le Tama Tane Malosi faapea ai ma le mafutaga a faifeau, ae maliu nei le faifeau o loo faaauau pea le laua galuega i le leitio. E tele ni vaega o le soifua auauna o le Fetulima Mika ua faamalosia ai foi lana ia auaunaga i le Atua, e pei o le lototele ma le ola faatuatua o le tagata o le Atua.
Soo se po lava e fai ai le polokalame e lē taitai faavaivai le faifeau i le polokalame i le leitio. E iloa gofie lava ua gasegase le faifeau faatoa iloa foi ua misi ma le polokalame. O le auauna e loto foai, e auauna toe taitai, e tutusa lava ia te ia le taimi e auauna ai ma le taimi e taitai ai.
O le tagata e mafai ona avea ma taitai toe avea ma auauna, e toa le loto e fai ana faaiuga i soo se mea. E leotele lana tautala toe leotele ana galuega faatino.
E lei leva ona tatala le mafutaga tatalo a le West Auckland Prayer Warriors ae ofi atu ai loa i totonu le susuga ia Fetulima Mika, ma ua latalata i le 20 tausaga talu ona iai.
O le mafutaga lea sa amata i le maota o le susuga i le a’oa’o ia Tavai Meni, ae te’i ua manao Fetulima Mika e avatu i lona fale e fai ai lea lava sa faaauau mai ai lea mafutaga seia oo mai lava i le taimi nei.
Molimau le susuga i le a’oa’o ia Tavai Meni o le auauna ia Fetulima Mika e tumu i le faatuatua. Ua leva ona tatau ona alu i Ausetalia ae lē mafai ona alu ese ona e pele ia Fetulima Mika le mafutaga tatalo auā o le isi malosiaga lea o lana galuega ma lona soifua galue i le Atua.
O mafutaga e fai i po o Aso Lua, ae lē mafai ona uma se mafutaga ae lei faia se meaai i le po o le mafutaga. E lē faigaluega ae faalagolago i lana penifiti e fai ai meaai. E alofa i soo se tagata ae sili ai le alofa o le auauna i lona Atua.
O le Aso Gafua na fai ai lona sauniga faaleaiga i le malumalu o le ekalesia EFKS Te Atatu lea sa taitai ai le susuga i le toeaina ia Rev Lucky Slade ae o lona sauniga mulimuli sa faia lea i le Aso Lua i le hall a Samani Pulepule lea sa taitai ai le susuga ia Pastor Tavale Mataia ae sa vaavaalua ma le susuga ia Pastor Poni Fonoti.
Sa faatumulia le aso mulimuli o toe sauniga o le susuga i le faafeagaiga i faifeau ma o latou faletua faapea aiga uo ma ē masani sa molimauina le toe mafutaga ma lea auauna faamaoni a le Atua.
