Miss Samoa Australia Queensland 2019 ma lona tina

O lupe sa vao eseese a ua fuifui faatasi, ina ua faatasia Samoa ma potopoto, e maualuga ai pea le viiga o le Atua. O se po uigaese le faatumulia i le mamalu o Samoa i Kuiniselani i le Aso Toonai ua tuanai, 3 o Aokuso ona o le molimauina o le faapaleina o le tamaitai ua filifilia ma avea ma tausala Samoa i Kuiniselani (Miss Samoa Australia) e pei ona resitalaina ma faavaeina mai ai. Na amataina i se sauniga lotu na ta’ita’ia e le susuga i le faafeagaiga a le AOG a Inala, Pastor Amataga Imo e muai momoli ai le faafetai i le Atua, ona faagasolo lea o polokalame o le po e pei ona faataunuuina i le Acacia Ridge Hotel. O le tofa ia Tuaoina Sarah Brunt sa fai ma fofoga o le po.

Na faamae’aina ai foi le tofi o le tamaitai o Noelani Erin Taefu sa tauaveina le pale o le Miss Samoa Australia 2018-2019, ma sa matagofie lana saunoaga faamavae ma lana faamalosi’au mo le tausala ua paleina le pale.

O le  tamaitai o Sheckinah Hadfield-To’ala e 18 ona tausaga, o loo a’oa’oina nei i le Iunivesete o Griffith (Griffith University), i le sailia o lona faailoga o le Bachelor of Criminology, ae o lea ua faapafala i le taimi nei ona o le fia fai o sona sao e a’oa’oina atili lona silafia o tu ma aganuu a Samoa. O lona faanaunauga ia a’oa’oina ma ia mausali lona silafia ma ia lelei lana tautala i le gagana Samoa. O se mitamitaga mo ia, ona o lenei avanoa sili ona tāua, ma o se faitotoa ua tatalaina nei e mafai ai ona ia iloa atili tiute tauave o le tamaitai Samoa, ae lē gata i lea o le vafealoa’i o le isi Samoa i le isi Samoa, aemaise lava i tagata matutua.

O Sheckinah na soifua a’e i Ausetalia nei, o lona tamā o le palagi Ausetalia (Mark Hadfield), o lona tinā To’ala Ianetta Hadfield, e mai afioaga o Faga Faasaleleaga, Satupaitea, Avao, Safa’i, Sasina, Fasitoo-uta. Na molimauina foi le lagolago a mafutaga eseese faapea ekalesia, ae tainane le gapatia o le Komiti, aiga ma uo na vaaia ai le matagofie o le po.

Na aloaia ni saunoaga faapitoa e lē gata o le sui o le Komiti le faatamā afioga ia Tauiliili Peseta Ata Malifa, ae faapea foi le faatonu o le Miss Samoa Ausetalia, Fonoti Talevu Galumalemana i se talaaga ma le faagasoloina mai o le faamoemoe aemaise lona agai i luma. E lē gata i lea o ni saunoaga na saunoa i ai Fonoti e faamalosi ma lu’itau ai le tamaitai o Sheckinah e tia’i le fefe ae ia mautinoa lana savaliga e manuia ai ona ala.

Trophy o le Charity na saunia e Thomas Mikaele taalo mo le Tigers, tauaao e loma tama, faapea le faatonu o le Miss Samoa Australia ma le tamaitai tauva

O le talita a le Charity, na agalelei mai ai le tofa ia Tuitumua ma Tina Pio Mikaele e pei ona lagolagoina e le susuga i le alii taalo a le Tigers, Thomas Mikaele. Na mae’a polokalame o le po, ona fetalai lea o le tofa ia Patea Pesamino Taefu e fai ma sui o le komiti e faafetaia le paia o Samoa na ofaga potopoto ua maualuga ai ma mamalu le po fiafia. Sa saunoa faafetai le susuga ia Rev Risatisone Taufao ma faaiuina ai i se tatalo. 

Na faafetaia foi e le komiti i latou uma na agalelei ma sasaa lo latou valevale alofa e ala i siva Samoa faapea le foai paia, e pei ona iai le afioga ia Lemalu Peni Fenunuti ma sui o le leitio 4Eb, Samoa Tuufaatasi i Kuiniselani, Taupati Faatasi, Tofa Saili, Jason Funeral (Leafinealii Terry Fauea) ma le toatele ua tino ai le faamoemoe i lea afiafi. Ua tapena atu le komiti ma le tamaitai tauva ia Sheckinah Hadfield-To’ala e tuua Kuiniselani mo Samoa i le aso 27 o Aokuso auā le tauvaga tele o lumanai nei i Samoa.