O le vaiaso nei ua alu le vaiaso o feagai lenei ofisa ma faafitauli i mataupu i totonu o Ekalesia eseese i Niu Sila nei faapea ma Ausetalia.
E tele vaega eseese e fia talanoaina, ae e lē lava le tatou column e talanoa auiliili atu ai nei mataupu tetele ma faafitauli i totonu o lotu, o loo afaina ai o tatou tagata. Ae o le a otooto atu na o ni mataupu e mafai ona ofi atu, ona atonu e aogā mo le tatou lumanai i galuega a tatou Ekalesia.
E oo mai lava i le asō, o le tele o o tatou tagata o loo iai le talitonuga, o mea tau lotu e lē aafia i lalo o le tulafono. E iai foi ni faai‘uga mai faamasino e fai mai e le aumaia i le fale faamasino mataupu tau lotu. Ae o loo o‘u finau ma faasino i nisi mau faai‘uga a faamasinoga i Ausetalia ma Niu Sila ma nisi atunuu, ou te faaseseina ai lenei manatu.
E lavelave ma faigata mataupu tau lotu ona e iai Ekalesia e leai ni faavae o Ekalesia taitasi ua lesitalaina i le tulafono (Constitutions) ae faamoemoe i le faavae e tasi o le Ekalesia aoao, e opogi ai galuega a Ekalesia taitasi ei lalo o le faamalu o lea Ekalesia.
E iai foi Ekalesia taitasi e iai a latou faavae, ae eseese faaupuga o faavae o Ekalesia taitasi; ma faaupuga o le faavae o le Ekalesia aoao lea e opogi ai nei Ekalesia i lalo o latou faamalu.
E iai Ekalesia e leai ni faavae poo ni Trusts e faatulafono ai faiga o galuega a le lotu ma puipui ai i lalo o le tulafono ia tupe maua a Ekalesia, ma meatotino e iai Falesā.
E tele lava la ina faatamala o tatou tagata, se‘i vaganā ua tutupu mai ni faafitauli ma ni vevesi ona faatoa tapa lea i se fesoasoani i luga o le tulafono.
Mo le silafia lautele o Tulafono nei, e tāua tele ia tatou e lolotu ona malamalama i ai auā e opogi ai i lalo galuega ma le uuina o meatotino a le Lotu:
1. Incorporated Societies Act 1908 e iai i lalo tulafono mo sosaiete uma lava e lesitala faavae i lalo o lea tulafono faatonuga o tulafono e tatau ona uia. O lotu ia e iai faavae, o le tulafono lea o lea e lesitala ai, ma e tatau ona malamalama latou o uuina tofi i lea tulafono. E lē gata ia latou o umia tofi, ae tatau foi ona malamalama i latou e lolotu i totonu i lotu nei i latou aia tatau ma tiute i lalo o lenei tulafono.
O se faataitaiga o se mea o tupu mai i le taimi nei, mo se Ekalesia. O se iuga na aumai i se fale faamasino ua mautu ai le talitonuga a nisi o loo o‘u fesoasoani i ai, e leai se authority (faatagaga faaletulafono) na fai ai e se faifeau o se aulotu ma nisi o se aulotu ni mea na afaina ai nisi o se Ekalesia.
Ua mausali mai ai i lea faaiuga, e mafai e tagata ua afaina ona ave loa tagi faapatino i le Faifeau ma latou na latou faia ni laasaga, ua afaina adi nisi, ae leai se authority i le tulafono a le Lotu ma le faavae o lea Ekalesia na fai ai laasaga e le faifeau ma latou na faia mea sese, ae fai mai e iai le latou authority na fai ai.
2. O le isi tulafono e tāua mo Lotu o Trusts e uuina ai meatotino a Ekalesia e iai tupe ma Falesa. I lalo o Trusts Laws e lē mafai ona fesuiaina e se toatasi ni tonu o meatotino a se Ekalesia ae lei talanoaina ma uia auala o loo i lalo o le tulafono, e tusa lava poo le Faifeau.
O le mea e sili ona tāua e faamanatu atu, a o lei alu ni tupe a tatou e lolotu i se Ekalesia e te lotu ai, e tatau ona malamalama poo ā tulafono a le lotu lea e tatau ona e iloa ma malamalama ai.
A tutupu ni faafitauli i totonu o le lotu, tapa tusi tulafono a le lotu, ona uia lea o laasaga o loo tusia i totonu o faavae o le lotu, i se faafitauli o tulai mai, ae aua le tauaimisa muamua ma vevesi ona matagā lea ma fita se mataupu, ma oo ai i falefaamasino, e taugata ma fai e
faamasino iuga.
O le isi fautuaga o le fautuaga lea ia tautuana i Ekalesia e iai faavae, ia faaaogā faaupuga i totonu o faavae i le faiga o galuega a Ekalesia.
O lea ou te iloa o le tele o nisi faafitauli e mafua mai lea, i le lē faaaogāina o Constitution poo faavae, ae na ona fai ona taatia ese lea, ae fai lava le poto ma le iloa faasamoa o latou o i totonu o komiti o Ekalesia. E sili le puipuia i lo le togafitia!
