Ua faamautu se fesoasoani e $306,000 (tala Ausetalia) pe tusa lea ma le $600,000 tala Samoa mo le Iunivesite Aoao o Samoa e saili ai pe aisea lava ua laiti ai le numera o tamaitai faipule i le Palemene o Samoa.
O se suesuega ua manatu le Nofoaga Tutotonu o Aoaoga faa-Samoa a le Iunivesite Aoao o Samoa, ua talafeagai ona faatino ona o le manatu e iai lava le mafuaaga, ae ua tele tausaga o laga lenei mataupu e lē gata i Samoa ae faapea le tulaga faavaomalo ae e lē o iai lava se tali lelei o maua mai ai.
Ua iai le galuega ua faatino e le Malo o Samoa e pei ona pasia ai nei le teuteuga o le tulafono ua unai ai nei le siitia o le numera o nofoa o le Palemene e mafai ona maua e tamaitai, ae tusa lava pe ausia lea tulaga ina ia oo atu i le 15 pasene le aofai o nofoa o le Palemene e umia e tamaitai e lē tutusa lava ma le numera o alii o loo tulai mai i ia tofiga.
O le faaaliga a le Faatonu o le Nofoaga Tutotonu o Aoaoga faa-Samoa a le NUS, na talosaga ia Ausetalia ma mafai mai ai le tupe e pei ona faalauiloa mo lenei suesuega.
E fesiligia lava pe mafai ona ausia se numera toatele o tamaitai e tulai ma i tofi faipule auā a fuafua atu i le taimi lenei e na o le toalua o loo i lea tofiga i le taimi lenei o le Afioga i le Minisita o Faamasinoga, le Afioga Fiame Naomi Mataafa ma le Afioga Gatoloaifaana Amataga Alesana Gidlow lea o loo Minisita Lagolago i le Matagaluega o Mataupu tau Tina ma Tamaitai atinae o Nuu ma Aga Fesootai.
O le suesuega e pei ona ta‘ua e le afioga Leasiolagi Dr Malama Meleisea, o le a fesiligia uma ai lava afioaga uma o le atunuu, o faalapotopotoga eseese i totonu o afioaga mai i le pulega a alii ma faipule seia oo i mafutaga faalelotu, o mafutaga a tina ma tamaitai ma tau saili mai ai le mafuaaga ua maualalo tele ai tamaitai ua ofi atu i faiga faaupufai o le atunuu.
E fesiligia foi tamaitai uma ia na tauva i faiga palota ua tuanai i so latou finagalo i lea tulaga ma o faamaumauga uma e mafai ona aoina ma faamaumau o le a tuu i luga o se upega tafailagi ma o le a aogā lea i sailiiliga o loo faatautaia nei e faatatau i lenei mataupu ae e lē gata i lea o le a silasila i ai matagaluega a le malo ma ofisa ma faalapotopotoga tuma‘oti ma fua i ai a latou fuafuaga faataatitia i polokalame e unai ai le numera lenei e pei ona ta‘ua.
O le faafetai a le Iunivesite e pei ona saunoa i ai le afioga i le Pule le afioga Leapai Lau Dr Asofou Soo ona o le maua o lenei tupe tele mai i le malo o Ausetalia ma lana fesoasoani le AusAID auā na ta‘ua e silia i le 500 talosaga faavaomalo na filifili mai ai talosaga e 138 e aofia ai le talosaga a le NUS.
E na o le 50 talosaga o lea aofai na maua lea avanoa ma na ta‘ua e le alii Hai Komesina o Ausetalia Dr Stephen Henningham, o le maua e le NUS o lenei avanoa o le a faamauina ai i le isi foi taimi e toe talosaga atu ai auā e lava sauni ma mae‘ae‘a le faatautaiga o a latou talosaga.
E lē gata i lea ua faaalia e le alii Hai Komesina ua faigofie foi ona faatino lea tulaga ona o le suesuega lenei ua lagolagoina tele e Ausetalia i le taumafaiga ina ia malosi le tulai mai o tamaitai ma ia amanaia lo latou leo i faiga filifiliga faalemalo.
