E tolu afioaga o le a silasila i ai sui o le kamupani o le ETG mai Saina pe talafeagai o latou eleele tumatafaga ma le latou atinae o le faletalimalo e iai ma le fale kasino.
Ua faailoa e se molimau faatuatuaina o se matai o se tasi o afioaga o le a afea foi e sui o lea kamupani, o eleele tumatafaga i Lefaga, lea o loo iai le matafaga mo tafaoga o le Matareva o le tasi lea o nofoaga, faapea le nofoaga e ta‘ua o Nuu Vasa i Saanapu ma le afioaga o Mulivai i Safata.
O le vaiaso talu ai na fuafua e taunuu ai le aumalaga o sui o le ETG mai Saina peitai ona o ni tulaga lē maalofia, o le mafuaaga lea o le a faatoa malaga atu ai i le atunuu i le vaiaso lenei.
Ua maua i ni sailiiliga e silia ma le miliona tala le tau o le laisene mo se fale kasino ua faamatuu atu i lea kamupani, ma e iai le talitonuga o le tau foi lea o le laisene ua tuuina atu i se tasi o faletalimalo i le atunuu le Aggie Greys Resort i Mulifanua.
Faailoa e le Pulenuu i le fono a le nuu lona sese
O le mataupu lava lenei na tau faasalalau faalauaitele ai se faaseā a le sui Pulenuu o le afioaga o Mulivai Safata, i lona tetee i le fuafuaga lenei a le pisinisi faletalimalo mai Saina o le Exhibition Tourism Group o le a fausia ai i Mulivai le latou atinae tau tagata tafafao o le faletalimalo e iai ma le kasino.
Peitai na toe faatoese le alii Pulenuu i le pule mamalu a alii ma faipule faapea le saofaiga a matai o le afioaga o Mulivai Safata, e mafua i ana lafoga na sa faasalalau faalauaitele.
Na lipotia i se lomiga o le Aso Toonai o le nusipepa o le Observer, se finagalo o le afioga Leota Su‘atele e fitoitonu i ai eleele o le a fausia ai le faletalimalo, o loo faaalia ai e lea tamalii le faatoesega a le Pulenuu i se latou fono na fai.
O le atinae o le a fausia i le afioaga o le a faaaogā i ai le limaselau eka o eleele sa iai le faletalimalo o le Hideaway i Mulivai Safata i tausaga ua mavae, lea sa lisi e se tagata faipisinisi mai Siamani.
