O se tala fiafia tele mo Jil ma lona aiga faamanuiaga na ia maua i le taaloga o le Archery poo le fanafana ‘aū. Aua o Jil lea na mauaina le uluai pine auro a Samoa i taaloga o le Pasefika. O lana fana na sili ‘ai i le 70m Recurve ma manumalo ai i le pine auro. Na tu lua le tamaitai o Isabelle Dusoi o Tahiti.
I le fanafana ‘aū o le 50m Recurve na tu lua ai Jil i le tamaitai Tahiti o Dusoi ma maua ai e ia le pine siliva semanu e toe maua foi e Jill le pine auro lea.
Ae na toe faaopoopo le isi faamanuiaga tele mo Jil aua na ‘au ma lona tuaa o Muaausa Joseph Walter i le fana o le ‘aū feifiloi 70m Recurve ma sili ai o la ‘ai ma manumalo ai foi Jil i le Pine Auro. O Pine Auro ia e lua a Samoa na maua i le Archery. E fā pine auro mo New Caledonia, tolu mo Fiti ma le tasi a Tahiti.
O le uluai pine auro o le Pacific Games na maua e Jil o le meaalofa sili lea mo ia i le atoaga o lona 18 tausaga i le aso lava lea o le taaloga. Ua aogā ai le fa masina na toleni ai Jill i Saina e tapena mo taaloga o le Pasefika faatasi ma isi ‘au a le atunuu na malaga uma atu e toleni i Saina.
Na faaalia foi le fiafia tele o Muaausa i le malo ai o Jil i le pine auro, aemaise ai o Muaausa o le Peresitene lea o le taaloga fanafana ‘aū i totonu o Samoa. E tolu isi pine a Samoa na maua, o pine apamemea e lua na maua e le tamaitai o Naifoua Vise Timai i le Women’s 50m Ranking Round ma le Women’s Matchplay compound. O le pine apamemea lona tolu mo Samoa na maua i le 50m compound mixed team.
