Musu EFKS e ofi LMS Toe Fuataina i le fono a ekalesia Soofaatasi

O le fatu o aoaoga faakerisiano ia maua e tagata uma le ola fiafia, fealofani ma tausi le filemu ae o le fu‘a taualuga o le savavali i aoaoga a le Ao o le Ekalesia o Iesu Keriso, o ia o le Alo le Tamā ma le Agaga Sa.
O le finagalo lea o le failautusi aoao o le Fono a Ekalesia Soofaatasi le susuga i le faafeagaiga o Maauga Motu ina ua tāpā sona finagalo i le faamoemoe o le ekalesia LMS Toe Fuataina e avea ma sui o le Fono a Ekalesia Soofaatasi, le Samoa National Council of Churches.
Ua silia nei i le vaiaso talu ona mae‘a le fono faaletausaga a lea ekalesia sa usuia i Samoa ma tasi ai le finagalo o le komiti a le au Toeaiina ma usugafono sa auai, ina ia avea le LMS Toe Fuataina ma sui o le Fono a Ekalesia Soofaatasi i Samoa.
O le Aso Gafua na tea nei na feiloai ai sui o le LMS Toe Fuataina ma le failautusi aoao o le Soofaatasi ma faailoa i ai le tusi ua oo atu mai le failautusi aoao o le Ekalesia Faapotopotoga Kerisiano Samoa le EFKS, ua faailoa atu ai se iugafono ua fulisia ai i le teena e le EFKS o le ofi atu o le LMS Toe Fuataina.
“O lea ua logo ma faailoa i ai le tusi ae o lea foi ua iloa ai e a‘u ma le taitaifono o le Fono a Ekalesia Soofatasi, e ese le isi vaega o le LMS Toe Fuataina lea na avea ma sui o le Soofaatasi i le tausaga ua mavae”, o le finagalo lea o le susuga Maauga Motu o le failautusi aoao o le Fono a Ekalesia Soofaatasi i Samoa. “O le ma tuualalo ua ave i ai, ia taumafai e faafeiloai le isi itu ma fai se leleiga ona o mai lea i totonu pe afai e fia nuti mea faatasi ma ekalesia kerisiano ua avea ma sui”.
Peitai o le tali a le failautusi aoao ina ua tuliloa i se fesili, o le a silasila atili le komiti faafoe a le Soofaatasi i le mataupu lenei pe a faia le fono a le Komiti Faafoe i le masina fou o Setema ma o le a iloa ai se fingalo o le taitaifono ma le komiti faafoe, pe afai o le a lē mafai ona toe faatasia itu e lua o le LMS Toe Fuataina, aemaise ai o se faaiuga i le tusi tetee a le EFKS.
E lei maua se avanoa e toe fesiligia ai le LMS Toe Fuataina i le tulaga ua tulai mai i le latou savali na faaoo ai le iugafono i le fono a ekalesia soofaatasi i le fia avea ma sui auai o le soofaatasi a ekalesia.
Ae o le saunoaga mai a le failautusi aoao o le Soofaatasi le susuga Maauga Motu, ua maua faamatalaga o loo vaeluaina finagalo ma lagona o le komiti a le au Toeaina a le EFKS i le avea o le LMS Toe Fuataina ma sui auai. “O le mataupu sa tuuina atu i luma o le fono tele a le ekalesia i le tausaga nei ma o la‘u faalogo e vaeluaina lagona ma manatu, ae o le a faailoa mai le tulaga ua fulisia i ai le finagalo o le ekalesia e ala i le tusi ua aumai”.
O le LMS (London Missionary Society) sa igoa muamua ai le EFKS a o lei suia le igoa i le tulaga ua iai nei.  O le fonotele i Malua i le tausaga nei na faailoga ai le limasefulu tausaga talu ona suia le igoa o le ekalesia.
O loo faavae se lagona tetee o le ekalesia ona o le faaaogāina o le igoa LMS, ae e talitonu le failautusi aoao o le fono a ekalesia ua faailoa atu e sui o le LMS Toe Fuataina ina ua latou feiloai ua uma ona alu le latou sailiga i Peretania na fofoa mai ai le LMS ma ua faailoa ane ai ua lē toe iai se LMS i Samoa. E ui i lea faaaliga a sui o lea ekalesia i le failautusi aoao ma le taitaifono o le soofaatasi i le latou feiloaiga, ae e iai le matega e faaono oo le finauga lenei i luma o le faamasinoga.
“O le naunautaiga lava o le fono a ekalesia soofaatasi ia taoto i se tulaga filemu lenei mataupu, o le isi foi itu o le fatu o le soofaatasi ia maua le nofo lelei ma le fealofani o ekalesia poo ā lava aoaoga ma talitonuga o loo eseese ai”, o le toe faaopoopo mai lea o le susuga Maauga Motu i se faatalanoaga ma le tusitala i luga o le telefoni.