Sauni Avele e faamanatu lona 90 tausaga

Ua amata i le vaiaso lenei faalauiloa a le Kolisi Maualuga a Avele aemaise lana asosi o tama ma teine tuai ina ia mautu ma ia lelei le faamanatuga o le atoaga o le 90 o tausaga talu ona faavae lenei kolisi i totonu o Samoa.
O se fono faaletausaga na usuia i le Aso Toonai na tea nei i le Maota o Tausi Soifua i Motootua na faamautu ai le toe tulai mai o le Komiti Faafoe o le Asosi ma tofia ai loa se komiti o le a feagai ma le sauniuniga o le aso faamanatu o le aoga i le tausaga fou.
“Ua pasia le tala o le tupe a le Asosi, ua tumau tofi o le laulau ma o lea la ua agai atu i le unai o galuega saili tupe mo le faamoemoe tele o le aoga,” o se saunoaga lea a Henry Fruean, le tamalii o loo ua tulai mai e faaauau le taitaiga i le tofi Peresetene o le Asosi a Tama ma Teine Tuai o le Kolisi o Avele.
O se aoga lenei na faavae ona o le taumafai e atinae le tomai faifaatoaga i tausaga e tele ua mavae. Sa toatele i latou mai i atumotu tuaoi o Samoa na aooga ai i Avele, o le mafuaaga foi o lana ula sisi lea e fai mai ana pese tuai e mai i Niue e ui o loo faapea mai foi fanau a le Atu Kuki na aooga i Alafua o i latou e ana le ula lea. Ona pau lava le faailoga mautu o le Kolisi e fesootai ai ia Samoa o le fua o le puataunofo ua iloa ai lenei aoga i soo se Tutoatasi ma soo se faatasiga tele a le atunuu.
Na mulimuli ane see aoaoga faa fai faatoaga i le lala o le Iunivesite o le Pasefika i Alafua e pei ona iai nei lea aoga i Samoa, ae avea loa Avele ma Kolisi a le Malo ma e tele tausaga e na o alii sa talia ai.
Ua lata nei i le 20 tausaga talu ona faataga tamaitai i le Kolisi o Avele ma o se suiga tele lea i le tulaga ua iai le aoga ma nisi foi o ana masani sa sau ai.
Ua mae‘a se maota tele o le aoga na fausia e lana asosi o tama ma teine tuai, o le tausaga foi lenei na tauaao atu ai se pasi a le aoga mai i le asosi lava lea, ma o lea la ua faamautu nisi o ana fuafuaga mo le aoga, faaopoopo i ai ma le taumafaiga lea e talimalo i sui tuai o le a autovaa mai i Samoa mo le faamanatuina o lona 90 tausaga.
“E tele ma anoanoai polokalame ua faataatitia ae o le Susuga Paepae Letoa lea ua tuu atu i ai e faauluulu i ai le komiti o sauniuniga mo le aso fanau o Avele,” o se saunoaga lea a le alii Peresetene. O le vaiaso la lenei ua amata ai ona faatulaga le polokalame mo le tausaga fou.