Faamanuiaga aso soifua Laasaga Sosene-Tupuola

O le ‘auga ma le autū o le faapotopoto ma le faatumulia o le aiga, o uo ma alo o le faletua malolo manumalo ia Laasaga Sosene-Tupuola, ona o le fia faamanatuina o le aso soifua o si o latou tina matua, ua aulia ai le 65 tausaga o lona soifua, i le Aso Toonai, aso 3 o Aukuso 2013.
Ma o le viiga foi lea ma le faafetai e muamua ai pea lava ona momoli lapalapa o mālō i lo tatou Keriso manumalo, auā ana lē seanoa o Ia, semanū e lē tau lau o tatou faamoemoega uma. O se mitamitaga sili foi lea e lē gata o alo ma fanau, ae o le auvalaaulia faapea  auauna a le Atua, sa latou molitai le taulaga o le faafetai i lea aso.
O lenei faatasiga sa faia i le faletaumafa o le Happy Days i Manukau, ma sa vaaia le faagaeetia ma le agaga fiafia o le faletua malōlō manumalō a o ia saunoa faafetai, ona o i latou uma sa auai ma molimauina lona faamoemoe poo lona aso faapitoa.
E momoli atu ai foi alofaaga e tele mai i ou aiga, uo mamae aemaise ou alo ma fanauiti (grandchildren) mo oe le tinā Laasaga. Aemaise ai foi o le tatalo faifai pea ina ia agalelei pea lo tatou Tamā o i le lagi, ma saga tulu‘i nisi aso se tele o lou soifua, e tatou  te mafuta ai pea.