O le vaitaimi lenei o le tausaga e gasolosolo atu ai i Samoa le toatele o tagata aau mai atunuu i fafo mo feausiga a le Samoa Events.
O nei faamoemoe e amata lava i le 10km aau i le Aso Gafua e fai i le ava i Saoluafata. Ae o lenei tausaga, na faaopoopo ai le isi tuuga e 15km. E to’afa na feausi i le 15km ae to’a 13 na feausi i le 10km. E 2.5km le mamao o le lio na faatino ai le tuuga. E amata mai i Saolaufata Tai i le matafaga, agai atu ai i Eva i le pole i Matu, liliu mai iina ona agai lea i le loloto i Fusi i tua o le motu o le Albatross Island, ona toe foi ai lea i Saoluafata. E faafā ona taamilo mo le 10km ae faaono ona taamilo i le 15km.
O le tuuga o le Aso Lua o le 5km mai Sauano i Fagaloa Tai e tini i Falefa i tua o le faleoloa o Mose. O tagata tauva uma i le 15 ma le 10km na o uma i le 5km – ma o le tamaitai o Jess Evans mai Brisbane na mua i le tuufaatasiga. O ia na mua i le 15km ma le 5km.
O le tamaitai o Christina Harris na tu lua, ona sosoo ai lea o Dan Feisst mai Aukilani, Scott Newmann mai Brisbane ma Mike Cochrane o Aukilani. O le taimi muamua lenei o Evans i Samoa. Na malaga faatasi atu ma lana paaga o Scott Newmann e tauva i tuuga mamao, ma le Samoa Swim Series na sosoo ai.
Ae e lei iai se isi na sōsō i le saoasaoa o Jess i tuuga mamao. Mai le amataga o le 15km na sola ai Evans i luma ma nofo ai iina. O le tu lua mai le amataga o Harris e oo i le tini. O Scott Newmann na tu tolu ma Cochrane na tu fa.
I le 10km o Dan Feisst ma Kirsty Craig mai Aukilani na avea le tulaga muamua ma le tulaga lua, ma Michele Pezutti of Sydney, Ausetalia na tu tolu. E to’afa Samoa na tauva i le 10km, o Siliga Sani Muliaumasealii o Lonetona, Egelani; o Samasoni Nimarota Maoga o Leusoalii. O isi o Manaia Toalepai, Ronny Iosefatu ma Luaipou Pimoe o Saoluafata.
O le tuuga 5km na amata i le taeao o le Aso Lua mai Sauano. O le moana loaloa lea ogasami ae o le tulaga foi lea e matuā fiafia iai tagata aau. Na ta’i i le tolotolo i gataifale o Falefa le tuuga ona liliu ai lea agai i tuaau, ma oo i le ala vai e tafe ai i tai le afu. Ona tini ai lea i Falefa.
Na muamua amata le au feausi telegese ona amata ai lea o le ‘au saoasaoa. E 20 minute na va ai vaega ia e lua, ae uma ane, ua mua i luma le tamaitai o Jess Evans, tu lua Dan Feisst ma Christina Harris na tu tolu.
E maoa’e lea tuuga ona o le moana sausau na alu ai le tuuga. Ae na fesoasoani vaa e lua a le Matagaluega o Leoleo mo le saogalemu o tagata asiasi atu i Samoa.
Faaiuga o Tuuga
15km
Jess Evans (Brisbane) 3itula 56minute
Christina Harris (Nelson) 4:20:00
Scott Newmann (Brisbane) 4:55:00
Mike Cochrane (Auckland) 5:20:00
10km
Dan Feisst (Auckland) 2:55:00
Kirsty Craig (Auckland) 3:10:00
Michele Pezutti (Sydney) 3:20:00
