O le tamaitai lenei mai lava i lona laitiiti o le toatele ia na molimauina le lelei i le taaloga o le tenisi aemaise lava i tausinioga i totonu lava o Samoa. E lei umi ae amata loa ona tausinio i tauvaga o le tenisi i totonu o le Pasefika, ma ua oo lava i taaloga a le Pasefika aemaise foi taaloga i fafo atu o le Pasefika ua vaaia lava le agai pea i luma.
O lea faato‘ā mae‘a tausaga e lua na faamautu ai o se sui lea o le Asosi Tenisi a Samoa i Ausetalia auā le taumafai lava o le asosi ina ia a‘ea se isi maualuga i le taaloga a lenei tamaitai. O lea la ua toe talosagaina nei le atunuu i lona aao mafola auā le unai pea o le lagolago mo lenei alo o le atunuu i taumafaiga i le tenisi.
O le vaiaso lenei na faalauiloa ai le liliu o lenei tamaitai i le taaloga lenei i le itu faapolofesa ma o se suiga o le a vaaia ai loa le vave ona laalaa i luga o le taleni a lea tamaitai. Faato‘ā taliu mai se au tenisi a Samoa e toatolu na tausinio i tauvaga o le Oceania, ma na manumalo ai Steffi Carruthers i le taamilosaga a tamaitai o le Juniors i le Oceania atoa, ae ua tulaga lua nei i le Pasefika atoa.
O le faalauiloa ai o lona agai i tenisi faapolofesa ua faamautu mai ai ma se sikolasipi e atiae atili ai lana taleni i se aoga faapitoa mo le faaleleia o lea taaloga i Miami Florida i Amerika.
O le faafitauli e pei ona faaalia e le Faalapotopotoga, na mulimulitai lava i taaloga a lenei tamaitai mai i le laitiiti ma ofo atu i ai lana fesoasoani, le Faalapotopotoga o Tamaitai faipisinisi a Samoa le Women in Business – e taugata tele nei ituaiga avanoa ma e moomia lava le faaauau o se tupe maua mo le faataunuuina o taumafaiga a Steffi i le agai i luma.
O le tau atoa o le iai o Steffi i Miami e aofia ai le nofoaga e faamautu ai ma le tausiga e $4,000 tala i le masina. O se tau tele lea ma o le taimi lenei ua mafai ona maua sina fesoasoani mai i le Faalapotopotoga lenei o le Women in Business, ae o lea la ua faalauiloa i se fono ma tusitala le manaoga mo nisi lagolago e ala i kamupani faapea foi tagata lautele o le atunuu.
O le tulaga foi lea na oo i ai le toatele o alo o Samoa i le taumafaiga ina ia faaauau taumafaiga a fanau a Samoa i lenei taaloga, ma e toatele lava ua oo lava i le numera tasi i tausinioga i totonu o le Pasefika, ae ua lē mafai lava ona ausia se isi maualuga ona o le tulaga vaivai o le seleni poo le tupe maua.
O lea la ua taumafai le aiga o lenei tamaitai aemaise o le Asosi Tenisi a Samoa, se‘i vaai lava pe iai se isi suiga e oo i ai se tama poo se teine Samoa i nei tausinioga aemaise i le itu faapolofesa, auā e mautinoa lava e toatele o le matuā talenia ma lelei i lenei taaloga, peitai ua mautinoa lava o le lava o le tupe e mafai ona oo ai i le maualuga ua faapea ona oo i ai le tele o isi tupulaga.
Ua tālia lenei vaiaso pe iai nisi e mafai ona ofo atu se fesoasoani i taumafaiga a lea alo o le atunuu. O le ofi atu o Steffi Carruthers i le taaloga faapolofesa o le tenisi, ua amata mai ai i le numera 199.
O loo numera 75 i le lisi o tamaitai i lea taaloga i Europa, ae o loo numera lua i le Pasefika – Numera tasi i Samoa lava ia.
