O le malae i Petone, sa faatautaia ai le taaloga lakapi i le va o le aufili a le Wellington Samoans ma le aufili a le Fiji Barbarians i Ueligitone, i le Aso Toonai, aso 30 Setema 2012. O lenei taaloga sa faatautaia lea e se laufali papalagi mai le asosi a laufali a Ueligitone.
O le aulakapi a le Fiji Barbarians sa iai foi ni alo o Samoa sa filifilia e taaalo ai, ae o le au a le Wellington Samoans ua na o alo lava o Samoa sa iai. Sa manaia le susulu o le la i lea aso ma le taimi sa faia ai le taaloga. Na mataina foi le taaalo malosi ma le lelei o au e lua.
O le iuga o lenei taaloga e 71 ‘ai a le Wellington Samoans ae 5 ‘ai a le Fiji Barbarians. O faiaoga o le Wellington Samoans o le susuga lea ia Steve Sooialo mai le kalapu lakapi a Tawa ma le susuga ia Logan Tauiliili mai le kalapu lakapi a Upper Hutt.
O le Aso Toonai na tea nei, aso 6 Oketopa na fetaui ai le Wellington Samoans ma le B a le Wellington Lions. Ma e tuuina atu lenei lipoti e lei maua mai se iuga o lea taaloga. Faamalo le onosai malo le ivi!
