… e fai o le faaoolima i le tamā, ua matapogia ona toso lea o le toeaina i lalo atu o le auala laupapa na amata ai le faaoogalima ae sosola nisi alii ma le ato Tusi Paia a Tagaloa sa iai ma lana tupe
E lei malama lelei le taeao o le Aso Lulu o le vaiaso na tea nei ae vaaia le togiga a le Mau – ua iloa ai le afioaga o Vaimoso – o le laei lea na togiga ai le anoano na oo ane i Matautu ma gasolo ai i Le Afio i le Tama a le Fale ma le Matua ia Patau‘ave le lua toalua i Igoamatua Tomaagauaune ma Manuleleua ma oulua aiga.
E ese foi lea vaaiga i le taulaga i le masii atu o le afioaga ona o se faalavelave na aafia ai se tamā o le Vaimauga i le faaiuga o le vaiaso na tea nei.
O le ifoga, ua agai ai le afioaga ona o le manatu ua matagā le afioaga i le faasalalau solo ai o le osofaiga na faatino e ni taulelea e toalima faasaga i se tamā ua 73 tausaga le matua i totonu o le afioaga o Vaimoso.
O le ifoga o se faaiuga ua faia e Vaimoso, e ui e lei maliu lē na aafia i lea osofaiga e pei ona vaaia ai le tulai mai o gaioiga nei o ifoga.
O le mafuaaga lava ua uia ai e le afioaga o Vaimoso lenei gaioiga, ona o le vaai i le matua o le tamā na aafia.
O lea na saunoa le Afioga Tagaloa Simi, o ia ua atoa i le masina lenei le 73 o ona tausaga. E le gata i lea na faaalia e le afioga i le Pulenuu o Vaimoso, Faleafa Matai‘a, e fai lava e tupulaga lē pulea amioaga faapenei ae e lē faapea la e ta‘u ai i latou ma o latou aiga, “… e leai e ta‘uvalea atu ai lava le igoa o le afioaga”.
“O lea foi ua agiga solo i luga o leitio, televise ma nusipepa le nofoaga na tupu ai le faalavelave ma taulelea na faatino lea amio ma o le igoa lava o Vaimoso, lea ua faatasina atu ai,” o se finagalo lea o le alii pulenuu.
O le solo tele agai i le Vaimauga i lea taeao, na faatasi uma ai taitai o le afioaga e le gata i galuega faalemalo ae o taitai faaleaganuu ma le tupulaga talavou.
O le unai a le afioaga ina ia auai le tupulaga i lea solo tele mo le ifoga, ina ia vaavaai tupulaga i le taunuuga o uiga solitulafono e pei ona tuua‘ia le toalima o le afioaga i le faatino.
O vaaiga o le taeao o le Aso Toonai na tea nei i le agai atu o sui o le afioaga e taofi le faaoogalima ua faia ia Tagaloa, ua faalauiloa uma ma o le isi tulaga tuga o lea gaioiga ona e fai o le faaoolima i le tamā, ua matapogia ona toso lea o le toeaina i lalo atu o le auala laupapa lea na amata ai le faaoogalima ae sosola nisi alii ma le ato Tusi Paia a Tagaloa e iai ma lana tupe.
E ui i lea, o le mae‘a o le faatoesega a le afioaga na fofogaina e le afioga Patau‘ave Tafito, na faapea loa ona teu le tamā ia Tagaloa ma lona aiga.
“E le o se taui,” e pei ona folasia e le afioaga, ae o se faamaualaloga e aloaia ai le faanoanoa faatasi o le aiga lenei ma le afioaga i le tulai mai o uiga faapenei i tupulaga talavou.
Na faapea foi ona tuu atu e le afioaga i le afioga Tagaloa o se tupe e $1,000 e momoli ai le faatoesega tele ua faataunuu.
Na talia e le tamā atoa ai le aiga aemaise foi matai o le Vaimauga na molimauina lenei ifoga, ma faapea loa ona feiloai i latou na potopoto ai i Vaipuna i lea taeao ma faamautu ai le faaleleiga.
O le faamatalaga a le tamā na aafia, o ia “… e oo mai le oti e lē toe savali,” ae ua ia faamagalo ma uma foi lea mataupu.
O lea lava e faaauau suesuega a le Ofisa o Leoleo i lenei mataupu ma le faamatalaga a le sui Sooupu o le Matagaluega, le Afioga i le Komesina Lagolago le Afioga Leaupepe Fatu Pula, e faamautu moliaga i le mae‘a ai o ia suesuega.
