O le manaoga ua laga e le kamupani a le Apia Bottling lea o loo faatau atu i Niu Sila ma Ausetalia le sosi feu mai i Samoa.
O le tausaga na tea nei i le faaaliga o oloa a le Pasefika i Niu Sila na faalauiloa ai loa le sosi lenei ma amata ai lava ona faia uta e moomia i le maketi o Niu Sila faapea ai ma Ausetalia.
O lea foi la ua gasolo lelei le oloa lenei mai Samoa, ae o lea foi ua tulai mai atugaluga o le kamupani o loo gaosia lea sosi, i le lē lava o uta e faaauau ai lenei fefaatauaiga ma ia atunuu tetele. Faaalia e le susuga Papalii Ryan o loo pulea lenei kamupani gaosi oloa i Samoa, o le taimi lenei e tusa ma le 50 eka o loo maua mai ai e le kamupani le polo feu lea e gaosi ai le sosi lenei, ae o le manaoga ua iai nei i uta fia auina atu i fafo e tatau ona oo atu i le 500 eka o toga polo nei ona mautinoa lea le umi o le a iai lenei taumafaiga.
O se manaoga tele aemaise o lea ua ta‘ua e Papalii ua iai ma se isi maketi ua tatala mai nei i Amerika.
“E lē mafai ona agai i Amerika auā o inā loa o le a lē lava sa‘o ai lava ma uta ia e ave i Niu Sila ma Ausetalia,” o se faaaliga lea a Papalii.
Na ia ta‘ua foi o Amerika e motu loa ni uta, uma ma feutagaiga, ae e pei o loo mafai lava ona faasoasoa atu ia Niu Sila ma Ausetalia i le taimi lenei.
O se tasi lenei o laau o lea ua manatu le kamupani lenei ua tatau ona faalauiloa ma unai le faatau mai i faifaatoaga.
Faaalia e le sui o le Faalapotopotoga o pisinisi ma oloa faatau atu i fafo a Samoa, o Papalii Grant Percival, e valu afe (8000) lava le tupe e mafai ona maua mai pe afai o loo iai se faatoaga o polo feu i se fanua e tusa ma le lua eka. O se tupe tele ma e mafai ai ona faafaigaluega nisi e tauina lea laau.
E iai nisi e manatu e lē o lava le tupe o loo maua mai i le kamupani lenei auā o lea e $10 i le kilo o loo faatau mai ai e le Apia Bottling le polo feu lea mai i faifaatoaga ae o le ituaiga ninii lea e moomia.
O le afa tagapepa iila lea e sau ai faatau lea e maua ai le kilo ma atonu o le mafuaaga lea o le lē toatele o nisi o loo faatau atu le polo feu lea i le kamupani.
O le manatu o le kamupani e tele lea tupe ua ofo atu i faifaatoaga.
O le ituaiga polo feu foi lea e lē tau fua i ni fuata, e tau lava i vaiaso uma o le tausaga ma e faigofie lava ona toto e lē tau teuina foi.
E ui o lea e tatau ona toto ma e tatau ona iai ni fanua tetele e faatino ai e pei foi ona vaaia i le gasolo o le toatele i le nonu e toto i fanua o avanoa o aiga.
O lea la o loo faaauau ona faatau i Niu Sila ma Ausetalia le sosi feu e pei ona ta‘ua ae o lea ua faailoa i le atunuu e moomia lava le tele o le laau lenei e agai atu i totonu ona mautinoa lea o le saogalemu o le maketi lenei o le sosi ua faatau atu i atunuu i fafo.
