Faafotu le vaa‘ulu i le suafa FALEMALU o Sataua Savaii
E iai le manatu, o se uluai Saofai lea ua faia i totonu o Niu Sila poo fafo mai o le atunuu i Samoa, lea na uia ai uma faiga masani faaleaganuu a Samoa.
O le AsoToonai talu ai, aso 4 Fepuari 2012 i le itula e 10am i le taeao, na faia ai i Kalaiesetete se Saofai i ona itu uma faaleaganuu.
O lea saofai na faafotuai le vaa‘ulu i le suafa Falemalu o le afioaga o Sataua i Savaii, le paia i aiga o Mavaega, aiga o Tupu, aiga o Nofo, aiga na tafaifa aemaise le mamalu i le To‘afa o Sataua ma le fetalaiga ia te oe Le‘alugaiou‘aao, na faaee atu i le susuga ia Anetone Falemalu.
Na ta‘ua e le afioga ia Tuiloma Peter Crichton o lē na faapogai i lea saofai, o le Sa‘o foi lea o le aiga e faapea, “O le saofai ua uma ona faia i Samoa i le masina na tea nei, peitai, e lei auai atu i ai le alii o Anetone, ona o ni mafuaaga lē maalofia, o le ala lea na toe faatinoina ai ona o le agaga e tatau lava i le tagata ua faaee i ai se suafa ona inu lana ‘ava ma faapaiaina e faifeau ma matai o le nuu ma le aiga.”
Na amata le sauniga i le faigalotu ma le faapaiaina o le nofo e le susuga i le Faafeagaiga ona faasaga foi lea o matai o le nuu ma le aiga i la latou faaleaganuu.
Na mae‘a le aso ina ua tofutofusia le manu ma si ana i‘a e ala i faaaloaloga ma palapala ma lona saunia e le tofa ia Falemalu Petelo Anetone ma le aiga.
