Na vāvāō finagalo ma manatu faaalia o faauluuluga o leitio, televise ma nusipepa faapea ma le vasega o tusitala i lo tatou atunuu a o faia le feiloaiga ma le faatonu o le ofisa o le komisi o le toe fuataina o tulafono le Law Reform Commission i le aso Lulu 8 o Fepuari 2012, i le fia faamautu o le faatuina o se itutino o faasalalauga e suesueina faaseā mai le atunuu pe a iai ni faaletonu e aliali mai i le tautua ma le auaunaga a le aufaasalalau ma i latou o galulue ai i leitio, nusipepa ma televise.
O le fautuaga mai le Palemia i le Loia Sili ma le komisi o le toe fuataina o tulafono ina ia faia se sailiiliga e faatu ai sea itutino ua ta‘ua o le Media Council, na mafua ai ona tumutumu atu le toatele i lea feiloaiga ma le fesili a nisi o le au matutua i le galuega, pe aisea ua manatu ai le Malo e faia se tulafono e taiala ai le galuega ma faatu se itutino na te vailiilia ni faaseā pe a iai ni lape o le galuega.
O le faaseā a le Malo o Samoa na ave i le itutino faapea o loo iai le pulega o faasalalauga i leitio ma televise i Niu Sila, ona o tuuaiga i le faatinoga o le galuega a le tamaitai tusitala o le televise a Niu Sila o Barbara Dreaver, ma le alii tusitala o John Campbell o le TV3 a Niu Sila, ma e faapena le itutino o loo fia faatu i Samoa.
E mae‘a le feiloaiga ua tau maua ni manatu ma se malamalama o le toatele ma naunau ai nisi e faatino loa.
Peitai o loo iai le lagona o nisi o le au tino matutua o le galuega e ao i le Malo ona soloia le tulafono o faasalalauga tau faaleaga ma le tulafono o loo faasino ia i latou e umia nusipepa o loo faamalosia ai ona faailoa i latou na maua ai ni faamatalaga pe a iai ni lipoti e atagia ai le tau faaleaga.
O le masina fou o le a soloia ai e le Palemene le isi tulafono sa saisaitia ai le saolotoga o galuega a tusitala o le criminal libel lea e mafai ai ona molia se tusitala ma se faatonu o se leitio, nusipepa ma le televise i le faamasinoga pe a faamaonia ni tuuaiga o le taufaaleaga.
E lē fou i nisi o tusitala matutua le faia o se itutino faapea, ona o le sosaiete a tusitala Samoa le JAWS sa amatamea i le faataatia o se taiala faaletulafono e lima taitaiina ai le galuega a tagata uma o loo galulue i faasalalauga ma nusipepa i le atunuu.
O se poloketi sa faatupe e le faalapotopotoga o le Thompson Foundation lea ua mae‘a ae ua fitu tausaga e lei toe lotea ona sa faimea tuu le sosaiete i le toe tuliloaina o fautuaga sa tuuina mai e le alii o Ian Beales sa nafa ma le poloketi.
O le vaega mulimuli o le galuega a lea alii mai Peretania o le faatuina o se Media Council, peitai o le mutaaga lava o lana poloketi i le tausaga e 2006, na muta ai foi ma le toe asiasi i ai o le sosaiete a tusitala.
Faaalia e se tasi o tusitala sinia lona faafetaia o le Palemia ma le malo i le lalaga mai o le mataupu, ona o se faamanatu tāua mo le sosaiete ma tagata uma o galulue i auala o faasalalauga ma nusipepa, ua oo mai le taimi ua tatau ona iai se itutino faapea, ma se taiala e aofia uma ai auaunaga tau faasalalauga ile atunuu.
E manatu lea tusitala sinia ua lē faailoaina lona suafa, o le taiala ua faataoto ma le faatuina o se Media Council o le a ausia ai e le galuega tau faasalalau i le atunuu se tasi o manulauti tāua i pulega faatemokalasi, o pulega lelei, manino ma le mafai ona mautali atu i tagata lautele.