O le aso tuupoina ma le taeao ua vaelupe maua, ae le vaelupe saa ina ua tu i mauga vaai i ula i le fesilafaiga fiafia a le afioga i le Sea, Rev Savaii Loto aemaise le mamalu o le faasinoti Niu Sila i Saute ina ua feiloai ma le susuga i le Tausi Matagaluega Rev Salafai Mika ma le Peresitene o le Auso, Fou Mika lea na ofaga potopoto i le Matagaluega i Hataitai Ueligitone. E tusa ai ma siitaga a le Koneferenisi Aoao Metotisi lea ua tofia ai Rev Salafai Mika e galue i Kalaiesetete, o le uluai taimi lea ua ia feiloai atu ai i lana sinoti fou i le aso 27 Aukuso, pei ona auai ai le mamalu o le aufaigaluega mai matagaluega eseese o le faasinoti i Saute faapea puletua.
O le susuga Salafai ma le faletua o Fou sa siitia mai le matagaluega Otara, ma o lea la na alofaiva ai le mamalu o laua aiga ga lua se’i momoli atu le O’o o le latou taulaga soifua i totonu o le sinoti.
Na amatalia le faamoemoe i le sauniga faafetai sa taitaia e le susuga i le Sea o le Sinoti, Rev Savaii Loto na ia saunoa ai nisi upu o lana lauga “Soo se aufaigaluega e tatau lava ona usitai ma faalogo i Le Ou le feau ma le galuega”. Na mae’a lea alo atu i le usu faaaloalo ma le aliitaeao a le mamalu o le sinoti, o le susuga i le pule autalavou Foua Tuisafia sa fetalai ‘ava, o le fetalaiga Talifaaifo Futi Taupau (Otara) sa fai ma sui o le aiga e molimoli atu le latou taulaga tagata e faafeagai ma le Sinoti fou ua tofia i ai, o le toeaina matua o le sinoti, fetalaiga Taulealeausumai Sione Taulealea (Hataitai) sa tu i matagiolo e fai ma sui o le afioga i le Sea, le mamalu o le aufaigaluega a le Atua aemaise le sinoti.
Talu ai ona o pelega o aso faapenei, na faapea ona alo atu le mamalu o le aiga o le susuga ia Salafai & Fou Mika e momoli atu le O’o o le tausi matagaluega i totonu o le faasinoti, o le fetalaiga Talifaaifo Futi Taupau sa faafoeina lea aso matagofie.
O ni faaaloaloga maualuluga na saunia, e pei ona tatala le auafa mau, sua faatamalii aemaise palapala malo, o se faaaloaloga maualuga mo le susuga i le Sea Savaii Loto, le Peresitene o le Auso Faasinoti, Perise Loto.
E lē gata i lea sa faatofutofusia le aufaigaluega mai matagaluega uma o le sinoti, ua faasafua atu foi le faaaloalo maualuga mo le matagaluega i Hataitai.
Ua malie le papa i Ta’u, ua malie le faga i Lau ae atu e le faga i Foa, ua talisapaia faatuaeleele faaaloalo maualuluga, ina ua mae’a lea pei o le i’a a le tautai e avatu, aumai, na fetalai faafetai le fofoga o le aso Taulealeausumai Sione tusa ai ma le agalelei foai ma faapea ona saunia se faatamalii matagofie mo le paia o le aiga.
Na alo atu i le taumafataga tele mae’a tapenaina, faaiu i upu taumavae ma faafoi ai pea le faafetai i le Atua, “Aua ne’i ia te i matou Ieova e, a ia tuuina atu lou viiga e faavavau”.
