Fesiligia teuteuga tulafono i faasalaga moliaga o le palota

Ua nunumi ma lē malamalama le taitai, le sui taitai ma le uipi poo le fofoga o alii o le Tautua Samoa i teuteuga o le tulafono o faiga palota sa latou soalaupuleina i le Palemene i le paeaiga ua mavae, e faasino i faasalaga ua aiaia mo se sui tauva o le palota e faamaonia ni ana faiga faaalatua o le palota i se tagi e faaulu i le faamasinoga.
O loo iai le talitonuga o le Tautua Samoa o aiaiga na pasia, o loo faasino tonu ai le molia i se moliaga faasolitulafono o se sui tauva na te faia ni faiga faaalatua i le palota mo le sui tauva na te faaulu se tagi o le palota.
Faaalia e le taitai le afioga Palusalue Faapo II, e lē faapea ua latou laga lenei mataupu ona o se tasi o sui tauva o le latou vaega faaupufai ua soloia lona tofi faipule ona ua faamaonia ana faiga faaalatua.
O le finauina o le sa’o tonu o teuteuga e mafua ona o loo manino teuteuga na pasia o le tulafono o palota, o le tagata na te faaulu se tagi e faia lana tautinoga poo le declaration, i luma o le lesitala o faamasinoga e faailoa ai lona lē aafia i ni faiga faatosina faaalatua.
A alu le faamasinoga ae maua ane ua faamaonia ni tuua’iga faasaga i le sui na tagi, e na o le tagata lea e mafai ona faia ni ona moliaga faasolitulafono ae o le tagata na faasaga i ai le tagi, poo lē na manumalo i le palota e na ona soloia o lona tofi faipule ma lē toe mafai ona tauva i se faiga palota e sailia ai tofi o le Palemene mo le umi e sefulu tausaga.
“Ua matou lē malamalama i le tulaga lea ua aliali mai, poo fea le sa’o”, na saunoa ai Palusalue Faapo II i se feiloaiga ma tusitala.
O le afioga ia Vaai Papu Vaelupe sa faasaga i ai tuua’iga o faiga faaalatua i le palota ia Mati i se tagi na faaulu e Tufuga Gafoaleata Faitua, o se sui tauva o Vaisigano Numera Tasi.
Peitai e lei faamaonia tuua’iga a Vaai faasaga i le sui na tagi, ae na o tuua’iga a Tufuga na faamaonia faasaga i le afioga i le Aloalii.
Ua soloia lona tofi faipule, ma lē toe mafai ona tauva mo le sefulu tausaga e tusa ma aiaiga o teuteuga o le Tulafono o faiga palota, peitai ua toe molia foi i moliaga solitulafono o lona faia o faiga faaalatua.
O le vaega lea o loo finau ai le Tautua Samoa ma fesiligia le Malo i le sa’o tonu o teuteuga.
“O le agaga na faia ai le teuteuga ia taofi le tele o tagi o le palota, ma o le mafuaaga foi lena na faaofi ai ma le aiaiga e faia le tautinoga a le sui tauva e na te faaulu se tagi ina ia faailoa ai e leai se mea tau faatosina faaalatua na ia faia, ae a maua na ia faia o lona faasalaga o le molia i le solitulafono o le bribery”.
O le finagalo lea o le tofa Lealailepule Rimoni Aiafi. O Moefaauo Lufilufi o se sui tauva o Anoamaa i Sasa’e peitai na ia faaulu le tagi faasaga i le sui na manumalo o Alai’asa Filipo Schwarts Hunt.
Ua soloia le tofi faipule o Alai’asa Filipo ma faasala e lē toe tauva mo se tofi faipule o le Palemene mo le sefulu tausaga. Ua molia foi le sui na tagi i le solitulafono o faiga faaalatua lea o loo i luma nei o le Faamasinoga Faaitumalo ona moliaga e 4 faapea moliaga e 13 o Vaai Papu Vaelupe.