A o feagai pea Kalaiesetete ma mafui‘e laiti o loo lūlū faavaipiriota, e pei foi ona faateia le aai i le Aso Sa a o sauni atu i sauniga lotu masani i le 11.05am, lea na iai se isi osofaiga malosi 4.5mg i le papa‘u 11km i le itu lava lea i Sasa‘e o loo saputu i ai mafatiaga, o loo lē mapu pea le taulogologo i tagata Pasefika mo mataupu fia faapupula atili e fesoasoani ai i aafiaga o le mafui‘e.
• O se polokalame faatulagaina mai le ofisa tutotonu o le Matagaluega Atumotu o le Pasefika (MPIA) ina ia faavasega ni aso faapitoa mo le atunuu lava ia pei o Toga, Fiti, Cook Island ma Samoa ma ia auai mai sui o ofisa eseese o le malo e pei o le IRD, WINZ, Immigration, Community Law aemaise ofisa o fale faapea le EQC (aafiaga o le mafui‘e), latou te fesoasoani e faamalamalama ni tulaga o fia fesiligia.
• Lea la sa faataunuuina ai le aso faapitoa mo Samoa lava i le hall a le aoga CPIT i le masina ua mavae atu, ma sa feololo le mamalu o le atunuu na mafai ona auai i lea Aso Toonai. Nisi o faalapotopotoga lagolago (supporting agencies) sa auai e pei o le Pacific Trust Canterbury, Te Vaka Tautua, Tagata Atumotu Trust faapea mataupu tau Aoga Matata Eseese lea na faaleagaina le latou faleaoga.
• E pei ona maitauina e le tusitala i lea aso i le faalauiloa mai e le sui o le EQC, o le tele lava o fesili e uiga i fale mautotogi o le malo, fale ua afaina ma ua o ese tagata ae o loo totogi pea rent, ma nisi o faaseā i le faifaiaga o le EQC e tali atu i faafitauli. Peitai sa taumafai le alii palagi e tau faamanino, ae na manatu le ulugalii Samoa o loo mafatia, pe lei alagatatau ona iai se tagata Samoa e talanoa i le tatou lava gagana.
• Na faapea foi se lipoti mai le ofisa o femalagaaiga, ona e fesili atu i tulaga o tusifolau ae tali le tamaitai o le ofisa e saili i luga o le upega tafailagi e maua uma i ai mea e manaomia.
O faalapotopotoga tuma‘oti faa-Pasefika e toatele tamafanau a Samoa e galulue ai ma faafetaia le latou tautua faaauau i lea aso, mo le soalaupuleina o tulaga tau soifua maloloina e pei o le tuipuipui o le flu, faapea aafiaga o le mafaufau talu le mafui‘e.
• Na faaalia e se tasi alii lona fiafia i lana mataupu tau lafoga totogi (tax) ma iloa mulimuli ane e toe maua sana refund ua leva o taata‘ai i faila a le IRD ina ua mae‘a talanoaga ma le tamaitai o Sera Faletolu.
O le fofoga o le aso (MC) sa faatautaia e Su‘a Uelese faatasi ai ma le lagolago malosi MPIA hub i Kalaiesetete faapea le faletua o Leata Aileone.
• Sa matagofie nai faleaiga sa faatau ai taumafa Samoa, faamalieina le atunuu i feleiva eseese ae sili ai ona fiafia le aufaifaleaiga ua foi fua ulo i le fale, maua sia faasiliga malosi tau seleni.
O le Aso Sa, aso 4 Setema ua atoa i ai le tausaga talu ona lūlū le mafui ‘e 7.1mg i le 4.35am lea na amata faaleagaina ai le tele o fale i le taulaga, o le faitau aofai o tamai mafuie na lūlū i le mae‘a ai o le luluga muamua e oo mai le taimi nei ua 8340.
