A iai le loto e iai le auala e mafai ai mea uma. E māmā foi se avega pe a galulue faatasi ma pulupululima faatasi e soosoo tau‘au. E ui ina tamatama le autalavou, peitai e iai lo latou agaga fia fesoasoani ma fia fai sao a o loma le fausiaina o le Ala o le Atua.
O le auga lea sa atofaina ai se aso o Aganuu e aofia ai faafiafiaga eseese sa faatinoina faa-Samoa, Tokelau, Carribean, Aferika, Hawaii ma Toga.
O lenei foi faamoemoe sa faataunuuina i le Aso Toonai, aso 10 o Setema i le hall a Burrows Federation i McCarthy Rd i Marsden. O siva matagofie a le atunuu o Toga e faagalogata ai si tamaitai o Anamalia sa maliu i le afi, o ia lea na feagai ma le a‘oina.
Na sioa le auvalaaulia i le onomea o alo laiti o le afioga i le aloalii ia Galumalemana Naea Harry ma Apu Timoteo, faapea alo o Dianne ma Mika Nansen sa faafiafia i lea afiafi, ma le kulupu a nisi talavou mai Fiti.
O le Taitai Autalavou o Sali Fetalaiga Lelili‘o, o le Sui Peresitene o Lillian Vaitupu Timoteo, o le Failautusi o Logan Timoteo, ma le Teutupe o Sylvia Ivo.
E ova atu i le $5000 le seleni sa faamaopoopoina ma ua faaagaaga ma faaputu mo lo latou faamoemoe. O se autalavou e magafagafa i auala ma metotia lelei e saili ai seleni auā le manaomia a o loma le fauina o le malumalu.
O le susuga lava i le tausi matagaluega ia Rev Ioane sa fai ma fofoga o le po, o ia lea o le failautusi o le Sinoti a Kuiniselani.
E lē o mapu le soifua galue o le autalavou auā o loo faagaioi pea fuafuaga saili seleni ina ina mafai lava ona taunuu le latou ofo i nisi o totoga o totonu o le falesa. Ua toe lava o se aga ona faavaeina lea o le maa faamanatu ma amata le galuega, ae ua mae‘a le maota o le galuega.
