O loo taofia nei i le falepuipui i Cairns le tina o loo masalomia lona fasiotia o se fanau e toavalu, e faatali ai ona moliaga mai lenei faalavelave matautia na tulai mai i le uma o le vevesi i Sini i le Lindt Cafe. O le igoa o lenei tina mai le Torres Strait Islands o Mersane Warria e 37 tausaga ae o le toafitu o tamaiti o loo masalomia na ia fasiotia o lana fanau lava.
O lea tala matautia na tulai mai i nai aso talu ona saunoa sui o leoleo i le Sauniga o le Kerisimasi a le Fono Aoao a tagata Samoa i Sini, e uiga i sauaga i totonu o aiga. Na popole le faafofoga a le atunuu i uma ane o se Samoa foi lenei tina ae peitai e leai.
O le matutua o nei tamaiti e toafā teineiti e tailua(2yrs) tausaga, selulutasi tausaga(11yrs) sefululua(12yrs), sefulufā(14yrs), ma tama e toafā e lima tausaga(5yrs), ono tausaga(6yrs), valu tausaga(8yrs), faapea le iva tausaga(9yrs).
O loo sologa manuia ona togafitiga i le falemai mai manu‘aga o le naifi lenei tina a o sauni atu le faamasino e lau lona iuga i se taimi o le vaiaso nei. E lē o mafai ona faailoa ata ma igoa o tamaiti ua maliliu talu ai itu faaleaganuu a atumotu nei o Torres Strait.
Sa nofo popole le tapuaiga a Samoa i Sini nei i le sau o le tala e faapea o se atumotu ae peitai e silafia mulimuli ane e lē o se Pasefika lea foi na agiagia i luga o televise, leitio ma nusipepa i le taimi na lafoia ai le pepe Samoa i le masina talu ai
