Na alo atu le Youngstar Family Daycare auā le faamanatuina i le po o le Aso Faraile na tea nei, aso 19 o Tesema, o le faaiuina o ana polokalame e pei ona tapenaina ai fanau, e ala i aoaoga aemaise le tapenaina o lo latou soifua a o tuputupu a‘e i totonu o aiga.
E toatele nisi o le atunuu na faamanuiaina i lea po, e ala i le tauaaoina o ni tusipasi, e pei ona a‘otauina ai lo latou soifua, e avea ma faiaoga auā le aoaoina o fanau iti.
O lenei Family Daycare o loo puleaina e se alii mai Aferika, ae peitai o le alo o le atunuu o loo faauluulu i ai tulaga tau aoaoga, aemaise le a‘otauina o i latou, ua sauni atu e avea ma faiaoga.
O le tamaitai ia Sai Nai, o se alo e faasino i le susuga i le faafegaiga ia Manuula ma Foloi Nai mai i Falealili ma Fagaloa, o loo ia umia foi ni faailoga taualoa, e tusa ma lenei matata o le faiaoga.
Na faatumulia lea po i mātua ma fanau, ua lē gata i Samoa, ae faapea foi ma isi atunuu o le lalolagi. O se vaaiga sili ona tāua i lea po, o le toatele o nisi o tamā ma tina ua matutua o latou soifua, ae sa faamanuiaina i tusipasi faa Daycare, ona o le naunau lava i le fia aoaoina pea o lo latou soifua.
O le fofoga o le po, o le tamaitai faiaoga lava ia Sai Nai sa nafa ma lea tulaga. O se tasi lenei o faamanuiga o loo maua mai i le malo o Ausetalia nei, e toe aoaoina ai le toatele o tagata ma maua ai le avanoa e faatautaia ai lava e le tagata lana lava pisinisi e ala i tulaga tau Family Daycare.
