O le mafuaaga lenei o le faia o se tusi e se tasi o alii leoleo ua faatea nei mai i lana galuega faaleoleo ona o le tusi na faatea ai o ia e le Sui Komesina o Leoleo o iai nei.
O le mau a Leuluaialii Maanaima Patu, ua faaali i se tusi ua avatu i le Minisita o le Matagaluega o Leoleo ma Falepuipui, le Afioga Sala Fata Tanielu Pinati Ah Leong e masalomia le faamaoni o le faia o lea faaiuga ma e ui o le Sui Komesina o Leoleo o iai nei o Fata Aviga Salale, ae o lona manatu o se isi Komesina Lagolago ia Misa Talaimanu Keti na mafua ai lenei faaiuga ma o Misa foi ua faatūtū i ai lenei faitioga tusitusia.
O loo fesiligia e Leuluaialii le mafuaaga o le faaiuga ua faamalolo ai o ia mai ona tiute faaleoleo, ae o loo tele isi mataupu ma‘ale‘ale e pei ona laga i lana tusi, e alagātatau ai ona faia ituaiga o faaiuga e pei o le faamalolo mai le galuega.
O le aso 16 o le masina lenei o Tesema na tusi atu ai le alii leoleo ia Leuluaialii Maanaima Patu i le alii minisita o le matagaluega, ae o le aso 12 na logoina aloaia ai le alii leoleo e ala i se tusi o loo saini ai le Komesina Lagolago le Tofa Fata Aviga Salale, e uiga i le faaiuga ua faia, a o tālia ai se faaiuga o se suesuega o loo faia faasaga i ni tuua‘iga o loo aafia ai o ia.
Peitai na faaalia i le tusi a le alii leoleo e pei ona ua tuuina atu ni kopi i le Alii Minisita o le Matagaluega e Pulea Tagata Faigaluega a le Malo, le Alii Palemia, Tuilaepa Lupesoliai Sailele Malielegaoi, Taitaifono o le PSC , le Tofa Tuuu Ieti Taulealo ma le Sui Komesina Lagolago o le Matagaluega o Leoleo ma Falepuipui, le Tofa Fata Aviga Salale, le matuā leai o sona malamalama i se mafuaaga ua faia ai lenei faaiuga ia te ia. O loo pogisa foi o ia i tuua‘iga ua ta‘ua e faasaga ia te ia.
E ui i ia lagona lē mautonu ma le lē talitonu i lenei faaiuga, ae na saunoa Leuluaialii na te taliaina le faamalolo o ia mai lana galuega, ae ia tala fetaui ma sa‘o le auala e fai ai.
O le tuua‘iga o le atalii o Misa Nafoi i le onā ma le ave taavale i se saosaoa matautia. O le atalii lea, o se alii leoleo foi.
Le vaega fou lea na faafaigaluega faavaitaimi i le taimi tonu o le fonotaga lona tolu a atumotu tauatiae o le lalolagi poo le SIDS, lea na talimalo ai Samoa i le masina o Setema na se‘i mavae atu nei.
Na tofu uma alii leoleo na iai i le taimi o lea faalavelave ma lipoti tusitusia na faia e uiga i lea faalavelave. Peitai e oo mai nei lava, e pei ona ta‘ua i le tusi a Leuluaialii, ua lē iloa poo fea o iai le faila o lea mataupu.
O loo masalomia e Leuluaialii o le mafuaaga lea o le tulai mai o suesuega ua tulai mai faasaga ia te ia ma ua faamalolo ai. O lea la e tālia suesuega a le ofisa o leoleo e faatatau i le mataupu lenei, ae o loo tālia foi se tali a le Minisita.
