O le amataga o le masina o Tesema na taunuu ai le tatou ‘au taalo sii uamea mamafa i le sii malosi poo le Powerlifting, mai Samoa mo Melepone i Ausetalia, auā le tausinio mo le taamilosaga Asia Oceania ma le Commonwealth Championships aso 7-14 o Tesema na se‘i mavae nei.
Toavalu le ‘au na malaga na fai ma sui o Samoa, lea ua faaiuina le taamilosaga i le faaiuga o le vaiaso na tea nei 6 pine auro, 9 pine siliva ma le 10 pine apa memea. O se tulaga lelei mo Samoa, e pei ona faaalia le agaga fiafia ma le mitamita o le latou faiaoga, Aitken Fruean i matati‘a na ausia ma tatae e le ‘au sii malolosi a Samoa i le faaiuga o lenei tausaga.
E aofia i lea toavalu nisi tama taalo fou e pei o le alii o Junior Tasi, Emau Fuimaono ma le alii 15 tausaga Tiperio, lea na mataina lona taumafai, na ia faatu ai le matati‘a fou i le Commonwealth ma le Oceania sub-junior record i le sii malele Deadlift i le mamafa 235.5kg. Tasi le tamaitai na tausinio o Matile Sitagata, o ia o loo umia le World Record i le vaega laiti poo le Junior i le sii o le Deadlift, na ia toe tatae lava lana matati‘a tuai, faatu le isi matati‘a fou i le vaiaso na tea nei i le sii malele (Deadlift) i le mamafa e 222.5kg.
O le alii o Oliva Kirisome sa sii i le vaega sinia na faamae‘a ai le taamilosaga i le Aso Toonai o le faaiuga o le vaiaso, ma le matati‘a na faatu i le sii malele (Deadlift) 340.5kg. Pine auro i le Deadlift, pine siliva i le tuufaatasiga o togi o le taamilosaga Oceania ma le Commonwealth o lenei tausaga, o lona uiga ua tulaga lua Samoa i le vaega sinia.
Pe a maitau i iuga ma le faasolo pea i luma o taumafaiga a nei alo o Samoa i lea foi faagatama, o le sii malosi poo le Powerlifting, ese mai i le siisii uamea mamafa le Weight Lifting. Ua matuā maoae le tulaga maualuga o le faatinoga o lea taaloga.
Ma o se lagona faatupu manatu, pe lē ua tatau ea ona faasee ane se isi vaega tupe e fesoasoani i le atinaeina o lea taleni a nai alo ma fanau, ma faasafua le sosia o fesoasoani tau seleni o loo aeae ai le lakapi ma isi taaloga, mo le faaleleia atili o lea faagatama i le lumanai.
Ona o nei tulaga lelei ma le tulaga maualuga ua ausia e le ‘au Powerlifting a Samoa, ua a‘e ai se tofa i le Komiti faafoe o le Asian and Oceania Powerlifting Championships, ua filifilia ai Samoa, e fai mai i ai le isi taamilosaga i le 2016.
E faamoemoe o le a toe taliu le aumalaga i Samoa, le faiaoga ma le autaalo i se aso o i luma.
