O le UQSPIA (University of Queensland South Pacific Islander Association) o le asosi ua lausilafia o alo ma fanau Pasefika o loo a’oa’oina i le Iunivesete a le UQ (University of Queensland). E lē gata i lea o loo iai foi sui o le UQSPIA mai le Griffith ma le QUT faapea nisi o tamaiti i fafo mai o le Iunivesete. Na faataunuuina le polokalame faaletausaga o faaaliga o tu ma aganuu aemaise siva a atumotu eseese o loo a’oa’oina a latou fanau i le Iunivesete a le UQ.
E lē o amoina pitotasi le avega, ua lē gata o le poto salalau ae o loo tausoa faatasi ma le faalauiloaina o tu ma aganuu a atumotu o le Pasefika ma nisi lava sao tāua o le asosi. E talitonu lenei asosi o tamaiti mai atumotu o le Pasefika, latou te mitamita e faalauiloa lo latou tupu’aga i isi foi tamaiti atumotu a’o mafuta faatasi ai.
O le autū moni, ina ia manatua ai pea toa na uluai asaina le gasū o le taeao mo se saolotoga o augatupulaga fai a’e lea ua sapi ma ‘ae’ae ai. E lē mafai ona galo le tupu’aga o mātua lea o loo faalauiloa pea i atunuu i fafo o aumau ai aemaise totonu o a’oga o loo fefiloi ai lanu ma gagana eseese.
E tele alo o Samoa o loo a’oa’oina i le Iunivesete a le UQ, ae to’a sefulu ma le fitu tamaiti Samoa o loo fai sao i le polokalame lea, ma e tele ni a’oa’oga tāua ma ni matalalaga fou ua maua mai e nei tamaiti, aemaise le faatuputeleina o le loto toa e tineia le fefe ae finau, sailimalo, faailoa ma faalauiloa atili tu ma aganuu a Samoa.
O le po o le aso 28 o Setema na faatino ai lea faamoemoe tāua a le UQSPIA. E lauiloa le UQSPIA i lana misiona tauave ina ia faamalosia ma unaia tamaiti Pasefika ia fausia ma faatupulaia pea fesootaiga i mea lelei o loo tausinio ai.
O le faailoa atu foi o tu ma aga ia i latou e lē o ni tamaiti Pasefika o se auala e tufa atu ai ‘oa ma tamaoaiga eseese ae faasili ona tumau le galulue faatasi ma felagolagoma’i, ma fealofani tamaiti uma.
O lea foi faamoemoe o se faamanatuga lea o le felanulanua’i o tu ma aga faaatumotu e pei o le atu Polenisia, Melanesia ma Micronesia lea na faatautaia lava e le vaega lea o le Iunivesete a le UQ.
O se po mataina i le faatumulia i mātua ma aiga aemaise uo ma aumea mamae a tamaiti e aofia ai Samoa, Niue, Atu Kuki, Maori, Toga, Papua Niu Kini, Tuvalu, Tahiti, Kilipati, Fiti & Hawaii. Na maualuga le faamoemoe o le UQSPIA i le auai mai o le Asosi a tamaiti Pasefika mai le Iunivesete o Griffith GPA (Griffith Pasifika Association) & GUPNGSA (Griffith University Papua New Guinea Students Association).
O le fofoga o le po o le susuga ia Tapenaga Jr Reupena, o le Samoa, o ia foi o le sui Peresetene o le UQSPIA. O le tamaitai o Rose Hosking o le Peresetene lea o le UQSPIA ma Betty Hoskins o ia o le Cultural Coordinator.
O le faatupulaia o le toatele o i latou i tausaga uma e lagolagoina lenei faamoemoe aemaise lava foi Samoa, o le ata vaaia lea o le tāua o nai fanau ma a latou taumafaiga, o se fiafiaga foi lea e tauivi ai ma finau pe a vaaia le opogi malosi a mātua ma aiga.
O le INSPIA o se tasi lea o polokalame e faatasi foi ona faia i le tausaga e taulamua lava ma faatautaia e le Asosi a le UQSPIA. O tamaiti e auai i le INSPIA latou te maua le avanoa e auai atu ai ma faisao i le tele o polokalame faatino a Iunivesete i soo se ituaiga tomai e lē gata o le itu i a’oa’oga (Education), inisinia (Engineering), ma le tele o nei polokalame tāua.
O i latou nei latou te faia faatalanoaga faapolofesa ma unaia tamaiti ina ia auai mai e faafofoga pe aisea e tāua ai le laasia o Iunivesete ma sona aogā. O le galulue faatasi, e a’oa’oina ai le tele o lesona, maua ai faamatalaga tāua.
O le tamaitai o Mary Harm na ia faia se saunoaga e faatatau i aafiaga ua aafia ai nisi o motu o le Pasefika i le suiga o le Tau (climate change) o loo unaia pea ma faamanatu e tatau ona galulue faatasi uma tagata e puipuia ia aafiaga.
