O moomooga faalupe o eleele naumati i alo ma fanau a Samoa o loo nonofo ma a’otauina i a’oa’oga i atunuu i fafo e pei o Niu Sila nei, o le tatalo lea ina ia iai se aso ma se taimi e liutino, ma faataunuuina ai se tasi o sini ma moemitiga i le a’oa’oina o le faasamoa i Niu Sila nei, o le malaga atu lea i Samoa e vaavaai ma molimauina vaega o loo a’oa’oina ma talanoaina i vasega, ae lei fetagofi pe vaai foi i ai mata.
E faapena ni lagona o alo ma fanau o loo a’otauina i le Papatoetoe High School i Aukilani i le vasega 12 & 13 i le Gagana Samoa, a’o iai i Samoa mo le lua vaiaso. Na taunuu i Samoa le malaga i le aso 22 o Setema ma faamautu ai i le faletalimalo o le St Theresa i Leauvaa, ma faagasolo ai nisi o faafiafiaga ma polokalame e tusa ai o le faamoemoe o le faigamalaga.
O le Aoga faaitumalo a Aana Numera 1 na muai faafeiloaia le aumalaga i le faatinoina lea o le ‘ava usu poo le aliitaeao e tama ma teine aoga lava o kolisi e lua.
O nisi o afioaga na afea e le malaga e aofia ai Manono auā le afifio o le To’a Fa o Alii ma Alo o le Malietoa ae tainane lo la toalua Futi ma Auapaau ma le mamalu i le Faleamanono.
I le motu i Salafai na talimalo ai le aoga faaitumalo a le Itu o Tane i le afioaga o Samauga o le paia auā le Afifio o Tupu o le Itu ma Tapa’au o le Itu aemaise o Tootoo o Finao.
Na asia uma lava foi le tele o mataaga o loo i le motu o Upolu faapea ma le tele o vavau o loo i le motu tele o Savaii e le laumua mai Niu Sila.
Sa maitauina foi le lolofi atu o aiga ma e pele ma tauaiga o i latou na malaga atu, e feiloai ma faailoa foi lo latou titi faitama e ala i asiga ma taumafa faasamoa eseese e tele mo le aumalaga. E fai foi o le na a’o lenei, auā e lē folo molemoleina e fanau ma i latou na malaga le mau asiga ua solo atu.
Peitai o tu lava ia ma aga e masani ai lo tatou atunuu pe a taunuu ma malotia fanua ma eleele aemaise lava o ni mslaga mai atunuu i fafo.
O tulaga i tapenaga e pei o le folafolaina o ‘ava i le usu, o lauga tali ma nisi o lauga ma tautalaga faafetai, na faatinoina uma lava e le fanauaoga e tusa ai o vaega lautogia o le latou faamoemoe.
O le Susuga i le alii faiaoga ia Timo Morisa ma le Susuga i le Pule Aoga ma nisi o faiaoga ma mātua o le komiti o le PTA sa aofia ai i le faigamalaga.
Na malaga faatasi mai ai foi ma le Susuga i le Faafeagaiga ia Tagaloa Tupu Sefo o loo a’otauina i le Aoga Tusi Paia i Filipaina ae o loo fai malologa mai i le faletua ma le fanau i Niu Sila nei, o se tasi o ona alo tamaitai ia Grace o loo iai i le vasega o le aumalaga. Sa maua foi le avanoa e fai sauniga uma ai le aumalaga i le Ekalesia Faapotopotoga a le Atua (AOG) i Lotopa SAOG.
Ae o le laualuga o faigamea i le talaaga o olaga o nisi o le fanau e le mafai ona toe galo, o le avanoa lea na latou feiloa’i ma faatalofa ai i le aao o le Susuga i le Ao o le Malo o Samoa. Le Afioga i le Tama Aiga, Tui Aana Tuimalealiifano Vaaleto’a Sualauvi II, i lona maota i Vailele.
O se feiloaiga ua ta’ua e nisi o le fanau na malaga faapea foi le Susuga i le Faifeau ia Tagaloa Sefo, e lē mafai ona toe galo i le loto.
O uiga agamalu ma tauagafau aemaise o si ana ‘ata’ata e manatua pea i le vaai.
O se matuai faamanuiaga lava i le fanau ma i latou uma na malaga mai Niu Sila le feiloai atu ma talatalanoa i le Tama o loo faaao i ai si o tatou Malo Tutoatasi o Samoa.
