E eseese lagona na tutupu i mātua i totonu o ekalesia taitasi i le Aso Sa ua mavae le Aso Sa ua faapitoa i fanau. O nisi o mātua e fiafia auā ua aulia faatasi mai e mātua ma fanau le Aso Sa ua faapitoa mo i latou, ae o nisi o mātua sa lagona le faanoanoa auā ua motusia mafutaga ma fanau ona o le valaau paia a le Atua, ae o nisi o fanau ua lē toe mafuta ma mātua ona o a’oa’oga.
E ui i nei lagona eseese i totonu o malumalu taitasi, ae lei tuua ai le matagofie o molimau, o tauloto, o pesega ma siva faalegaga na saunia e fanau e momoli ai lo latou sao i mātua e faatatau i le latou Aso Sa. O nisi o ekalesia e faamanuia lava loto o tagata i le ulufale atu i totonu o le falesa i galuega a fanau, a’o laulaututū mai ma faafeiloai tagata i o latou laufofoga fiafia ma faatalofa i tagata, mai lava i fanau pepe seia oo lava i tupulaga talavou.
Ua felanulanuai teuga ma laei o le fanau, ua faapena foi ia latou sauniuniga taitasi i polokalame, i le amataina o le sauniga. O le tele o ekalesia ua faatinoina ai e fanau tiute ma matafaioi o susuga i a’oa’o faapea ma tiakono sa masani ona fai i Aso Sa taitasi. O le aoina lea o le taulaga, tatalo amata, faitauina o le Tusi Paia faatasi ai ma aitema lea ua fai ma feau momoli i loto ma agaga o mātua ma aiga lea ua faalogologo ma matamata.
O susuga i faafeagaiga ma o latou faletua ma faiaoga Aso Sa, o le latou lea pito laau sa gafa ma i latou i le lua vaiaso na tuua ai le aoga, o le taumafai lea ia tuufaatasi ma a’oa’oina tauloto ma aitema a le fanau. O fanau o le tofi lea mai i le Atua, o le tamai olive foi lea i le laoai a le Atua, e fafaga e mātua i le upu e ala i le faatonuga ma le a’oa’o i le afioga a le Atua auā a oo ina matua e le toe te’a ese ai.
Ia fai ni taimi faaleaiga i afiafi e ala i lotu, ia maua se taimi tele o mātua e faaalu ia latou fanau e mafuta ai, auā o avanoa ia e lagona ai e fanau le leo o mātua ma le alofa moni o mātua e faatonu ma a’oa’o ai fanau ina ai manuia o latou ala. O nisi ia faamalosi au ma fafagu a fanau na faamanatu ai i mātua le latou tiute ma le matafaioi e tatau ona fai i totonu o aiga ina ia aua ne’i mamao lagona o fanau ma o latou mātua.
O āu o mātua fanau
O le vaitaimi nei o le tausaga e vaavaai ai fanau i le titi faitama o mātua. E le toe lagona ma manatua e mātua le faalogogata o fanau sa iai i le tele o aso, ae ua faaalu lo taimi atoa e fai ai mea lelei mo fanau auā lo latou Aso Sa Pa’epa’e. O teuga eseese e ala i laei taugata ua faatau, aemaise ai o faleaiga ua ave ai tamaiti e fafaga ai.
O le pitolaau fai toalua lea a mātua ma le faifeau o loo fai pea i tausaga uma i totonu o ekalesia ma aiga.
O lagona o auauna a le Atua a matua i nei galuega lelei, e faapea a lelei ona tapue ma faafailele le olaga o le tamaititi i totonu o le lotu e oo foi ina matua e le se ese ona ala ma a’oa’oga sa fai iai, ma o lena foi tamaititi e manuia lona olaga.
