O se po mataina a o feagai ai ma le sailia o se lalelei o Samoa i Ausetalia i le po o le Aso Toonai, 13 o Iulai. Na taitaia i se sauniga lotu e le susuga ia Rev Perelini Tauilo o le faafeagaiga o le EFKS o le matagaluega Kuiniselani.
O lea lava afiafi na faamanatuina ai ma le 10 tausaga talu na faavae mai le Miss Samoa i Ausetalia. Sa auai mai le Hai Komesina o Samoa i Ausetalia, afioga ia Lemalu Samau Tate Simi mai Canberra.
E lē gata i lea o Mafutaga e pei o le Aiga Samoa i le itu i Matu – Peresetene ia Taulapapa Lemalu Roy ma Joyita Slade; Leo o Tagata Samoa – Peresetene Faimalotoa Ioane Pale & faletua ia Pauli Zelly, ma nisi e iai le failautusi ma le sooupu; Logan Samoa Advisory Council – Peresetene ia Lesa Changwhy ma le failautusi; Sui faasetete o Woodridge i le Palemene (State MP) – Desley Scott, kalapu a le Fana Uma ma le toatele o malo faaaloalogia.
E toatele foi faafeagaiga sa auai na molimauina le tauvaga ma le lautele o le atunuu. E lalelei uma nai tamaitai tauva peitai e na o le toatasi lava e filifilia e tauaveina le pale o le Miss Samoa Ausetalia.
E momoli le agaga faafetai i Faamasino i le galuega mae‘ae‘a – Main Judge – Sitika Lemana Satui; Sitagata Atonio Tomeniko (Sini); Vaoiva Ponto – (Melepone); Tofaeono Robertson Palupe mai Samoa; afioga Tauiliili Peseta Ata Malifa, Convenor o le Leitio 4EB, ma Taralina Gaee sa avea ma Miss Samoa muamua i Samoa.
O ē sa faamaopopoina togi (Scrutineers) – Salā Kelemete Tito, Maria Carter, ma Manuia Milo Pereira mai Niu Sila. O vaega sa maka i ai le tauvaga: Taleni, Puletasi, Photogenic, Miss Internet, Traditional Wear, ma le Interview. O vaega uma nei e 6 sa faamanuiaina ma mauaina e le tamaitai o Muliagatele Renera Thompson, o le sui tauva mai Sini.
O le Best Sarong sa tutusa ai le toalua – o Muliagatele Renera Thompson (Sydney) ma Kristle Vaigalepa Leo (Brisbane). O le Miss Friendship sa maua e le tamaitai o Siuila Pouesi (Melepone).
O le 1st Runner Up o le tauvaga atoa, o le tamaitai o Kristle Vaigalepa Leo, o le alo o le susuga ia Rev Pevise ma Shirley Leo o le EFKS Setima Fou.
O ia foi lea ua manumalo i le Miss Charity ($7000) le seleni, ae tulaga lua ai i le Miss Charity ($6000) le tamaitai o Liuanome Alofaifo Kalepo, o le alo o le susuga ia Kalepo ma Susana Afemata.
Ma na faailoa aloaia e le Faatonu o le Miss Samoa o le a malaga uma le tulaga muamua ma le tulaga lua e tauaao le meaalofa mo tagata matutua i Mapuifagalele i le vaitaimi o le Teuila.
O le 2nd Runner Up i le tauvaga atoa sa mauaina e Olivia Howman (Melepone). O lē ua avea nei ma Miss Samoa Ausetalia 2013-2014 o le sui tauva mai Sini, o Muliagatele Renera Thompson na mauaina le ipu, faailoga tupe ma le pepa malaga fua ma toe foi mai i Samoa.
O nisi o tamaitai tauva na maua uma a latou ipu ma teufugalaau.
O sponsors, o le Hotel Melenium i Samoa; Kaffee Synergy mai NZ ma le Enchiro Laei (Galumalemana Harry & Apu Timoteo) Brisbane.
E maeu foi le agavaa ma le agamlie o le afioga ia Toleafoa Ian Asiata sa avea ma fofoga o le po, faapea le tamaitai o Eugenia McFall, Miss Samoa Ausetalia o le 2004-2005.
O tapenaga matagofie sa alo atu i ai le Faatonu ia Talevu Koleta Galumalemana, le sooupu ia Muliagatele Filipina Petelo, teutupe ia Feagia‘i Lilomaiava, tofā ia Taefu Patea Pesamino Taefu (Faatamā ma le aganuu) faapea le Komiti atoa, ua faamalo mo galuega lelei e pei ona molimauina i lea afiafi le faatumulia o le nofoaga i Beenleigh.
Sa fai ma sui o le komiti le tofā ia Patea Pesamino Maaelopa Taefu sa fetalai e faailoa le agaga faafetai i le paia o Samoa na potopoto sa maualuga ma mamalu ai le faamoemoe.
O le fetalaiga ia Leautuliilagi Malaeoalii Sogialofa Vaa Leapai na tulai e fai ma sui o le auvalaaulia auā se lagona faafetai i le komiti o le Miss Samoa i le matagofie o teuga ma fuafuaga uma o le po.
Iuga o vaega taitasi o le tauvaga:
Miss Photogenic: Muliagatele Renera Thompson
Miss Friendship: Siuila Poe Pouesi
Miss Popularity: Muliagatele Renera Thompson
Best Traditional Wear: Muliagatele Renera Thompson
Best Sarong: Kristle Vaigalepa Leo & Muliagatele Renera Thompson
Best Talent: Muliagatele Renera Thompson
Best Puletasi: Muliagatele Renera Thompson
Best Interview: Muliagatele Renera Thompson
Miss Charity: Kristle Vaigalepa Leo
1st Runner Up (Charity): Liuanome Alofaifo Kalepo
Aotelega:
Manumalo: Miss Samoa Australia 2013/2014
Miss Muliagatele Renera Thompson
1st: Runner Up: Kristle Vaigalepa Leo
2nd: Runner Up: Olivia Howman
