Silasila le Malo e faatau atu le kamupani vaalele Polenisia

Ua faatau atu e le Malo lana auaunaga tau fesootaiga telefoni ma initaneti i le kamupani mai Amerika Samoa, lea ua umia ai e le malo nisi o sea ae faatau ese isi sea. E faapena se fuafuaga i le kamupani vaalele o le Polenisia laitiiti lea o loo faia le tautua i malaga i luga o le ea i le va Samoa ma Amerika Samoa.
Ua faaalia e le minisita o Tupe le afioga Faaumuina Faaolatane Tiatia Liuga, o se tasi lea o meatotino a le malo o loo iai le fuafuaga faapea e faatau atu, ona o le naunau e faamatuu i tua auaunaga faapisinisi e faatino e pisinisi tuma‘oti.
O se finagalo o le Palemia, Susuga Tuilaepa Lupesoli‘ai Sailele Malielegaoi e faatatau i le fuafuaga lenei i le Polenisia na ia faaalia ai, o le vaai a le Malo e sili atu ona lelei le ave o auaunaga nei o loo i le Malo i le aufaipisinisi e faatauvaga ai ma isi pisinisi.
O le Polenisia lava ia e pei ona silafia o se isi ana auaunaga ua umia nei e le kamupani vaalele mai Ausetalia o le Virgin Australia, lea ua faipaaga ai ma le Polenisia ma faaigoaina o le Virgin Samoa i le taimi nei, ae sa faaigoa muamua o le Polynesian Blue poo le PolyBlue pe a ta‘u faapuupuu.
E lei leva ona faagaioia faapea lea auaunaga a le kamupani vaalele ae maua e le Malo ni faamanuiaga mai ana tupe mamā, ma o se fuafuaga foi faapea o le a faagaioi ai le Polenisia laititi o loo faia malaga i le va o Samoa e lua.
O nisi o auaunaga sa umia e le Malo ae ua faatau uma sea o le Malo e pisinisi mai tua e aofia ai le fale gaosi ‘avamalosi o le Vailima, o le Faletupe o Samoa lea ua umia nei e le ANZ Bank faapea ma SamoaTel lea ua umia le tele o ona sea e le BlueSky Samoa.
O le faalapotopotoga o le faleoloa o faatoaga ua faaalia e le minisita o tupe o le isi lea o auaunaga o le a ave e faagaioia e le aufapisinisi ma le fufuaga e umia pea e le malo nisi o sea ae faamatuu le tele i le atunuu ma le aufaipisinisi tumaoti. O loo taoto nei i le Palemene se tulafono e faatino ai lea fuafuaga e pei ona faailoa mai e le minisita o tupe.
Ua tulaga lelei galuega a le Polenisia laitiiti e pei ona faailoa ni tupe mamā poo polofiti ma o se itu lelei lea i le fuafuaga e faatau, e pei ona faaalia e le minisita o tupe auā o le a sili atu nisi tupe mamā na te maua pe a umia faapisinisi ma avanoa ai le atunuu lautele e faatau ai ni o latou sea.