‘Ua fefefe tulisi i le taufaaleaga o lipoti’… Palemia .

O loo faaauau finauga a le nusipepa o le Samoa Observer ma le Malo i se mataupu ua lalau ai e le Alii Palemia le “faatamaititi” o faaiuga a le Faatonu o le nusipepa, Mata‘afā Keni Lesa ma lona faasalalau o se lipoti ua tauleaga ai fua Samoa a o tumutumu le atunuu i sui o malo o le Pasefika.
Ua lua vaiaso talu ona amata le taligamalo a Samoa i Minisita o le Soifua Maloloina o le itulagi faatasi ai ma alii ma tamaitai fomai, o faauluuluga o lea matagaluega atoa ai tausi soifua. E tele fonotaga na usuia ae o le fono a Minisita na faatalatalanoa ai e tusitala le alii Minisita auā na fetaui lelei lea fonotaga ma le tatala aloaia o le falemai tele i Motootua lea na auai uma ai lava i latou nei mo le molimauina.
E toatele foi ua faaali lo latou agaga faafetai i le taumafaiga a le Malo o Samoa i lenei laasaga aemaise o le tele o le suiga o le a iai i masini faaonaponei ua mafai ona aumai mo le faatinoga o taotoga ia e agai lava e ave i fafo i tausaga taitasi.
O lea faatalatalanoaga na lomia i le Samoa Observer i le aso na sosoo ai ma e faapea, sa iai se tala na lomia na toe tusi ane lava le Minisita o le Soifua Maloloina na te lei faia ae ua vaai atu ua sau i le nusipepa.
Sa toe tali mai le Samoa Observer i le tali a le Alii Minisita ma faapea mai e talitonu pea le nusipepa i lana tusitala lea sa iai i le fono lea.
O le lafoga ua lomia e faapea ua faalauiloa e le Minisita o le Soifua Maloloina o Samoa o le a matuā tapu lava le ulaula i Samoa. O se tala na ta‘ua e le alii Minisita na te lei faia ma na faamaonia e isi tusitala e lei faia lava e le Afioga Tuitama se faamatalaga faapea.
E uma le vaiaso ae toe alu atu le isi lipoti a le Samoa Observer ua ta‘u mai ai le oo atu o le Alii Loia Sili i le fale o le faatonu o le Samoa Observer ma ua faamata‘u atu o ia ina ia tuu tusitusiga nei e fai ona ua na o le taufaaleaga ai o le Malo a o lea e tumutumu tagata mai i fafo i le atunuu.
Na ta‘ua e Mata‘afā Keni le faatonu o le Samoa Observer ua te‘i i le alu atu lava o le Loia Sili e tulituli atu le nusipepa i lenei lipoti.
O le lipoti tonu la lea na toe lāgā e le alii Palemia i lana fono ma tusitala i le faaiuga o le vaiaso ua tea, lea na faapea mai ai le taitai o le Malo, o taufaaleaga lava nei ua vaaia pea ma vaaia pea i lenei nusipepa, ua mumusu ai tagata ma pisinisi e fia teu a latou tupe ma faafaigaluega i Samoa nei.
O le iuga o le vaiaso na tea nei ae toe vaaia loa le lipoti a le Samoa Observer ua faatoese mai ua sese le lipoti na fai. O le sa‘o o le mataupu o se tamaitai o loo tau faataitai i le nusipepa sa agai ma se tamaitai ua fai si umi o galue i le Samoa Observer, o le faatonuga na ta‘ua e tusitala na ave i lenei tamaitai ua umi atu, o ia e faia le lipoti ae na o le vaavaai ma mātau o le tamaitai fou.
Peitai na tuu ai e le tamaitai lea ua tele aso o i le nusipepa si teine fou lea i le fono a minisita ae alu ese mo se taimi. Sau loa faatalatalanoa lana teine a‘o lea ae ave le lipoti e pei o ia e ana le tusitusiga.
Ua tuli le tamaitai ua leva i le Samoa Observer ma o le tamaitai lava na faia lenei lipoti, ua vevesi ai le Malo ma le Samoa Observer ona o le “faamatagā ai o Samoa” e pei ona ta‘ua e le Alii Palemia, ae o lea ua ta‘ua ua galue nei i le nusipepa a le Malo, le Savali.
O le mataupu i le alu fua o le Loia Sili i le maota o le Faatonu o le Samoa Observer ua ta‘ua e le alii Palemia e lei iai lava se taufaamata‘u auā o le Loia Sili e aulotu faatasi ma le faatonu o le nusipepa ma na mafua le alu i le fale o le Faatonu ona ua fiu e fesootai i lana telefoni e lē tali ane.
E masalomia lava na mafua ona tulai mai le faatonuga na ave i le Loia Sili e tusi loa le tulafono ina ia vave ai ona mautu se Fono Faatonutonu o galuega faanusipepa ma galuega tau faasalalau, na mafua mai ona o le mataupu lenei.
O le tali a le Samoa Observer ina ua fesiligia e nisi o tusitala mo se tali, e lē fia tali mai i le alii Palemia i ana faamatalaga ua lafo e pei ona lau ai foi le faatamaitiiti ona fai o faaiuga a le nusipepa ae “tuu ai pea le alii Palemia e fai lona ma‘ema‘eā poo fea e fai i ai”, o le faamatalaga lea na avane i tusitala.