O le ulua’i taimi lenei ua faamauina ai ile talafaasolopito o le Ofisa Su’etusi Sili a le Malo le vave ona tuufaatasia ai le lipoti a le Su’etusi Sili mo le tausaga 2017 e pei ona taatia ai nei i totonu o le maota fono a le Palemene.
O se tasi lenei o vaega e tele ina faitioina ai e le mamalu lautele o le atunuu le ofisa lenei o le Su’etusi Sili o le Malo ona o le tuai ona faamatu’u mai ai o lipoti i tausaga taitasi peitai ua ese lenei tausaga, ua toe lua masina o totoe ai nei mo le tausaga 2018 ae foliga mai ua vave ona auina atu ile Palemene le lipoti o le tausaga 2017, e iai masalosaloga o le a vave ona faitau iai le atunuu ile faaiuga o le tausaga lenei poo le amataga foi o le tausaga fou pe a vave ona pasia ai ile fono faitulafono a le Palemene o Samoa.
Ae ua faamanino mai e le taitai o le atunuu le Afioga ile Alii Palemia, Tuilaepa Sailele Malielegaoi, e faalagolago le vave o galuega a le su’etusi sili pe afai ae vave ona faamatuu atu e Matagaluega ma Faalapotopotoga a le Malo o a latou faamaumauga.
O le galuega a le Su’etusi, e tasu’e tusi, ae atili faigofie le latou galuega, pe afai ua mae’a ona tapena le tala o le tupe a lea Fa’alapotopotoga ma lea Fa’alapotopotoga, e o’o foi la i le su’eina o Matagaluega, e i ai a latou mataupu tulituliloa, e muamua fai ai le latou lipoti, e ave i le Matagaluega, ina ia maua le avanoa o Matagaluega e silasila ai po’o i ai ni vaega o le lipoti e tatau ona aumai ai se latou fa’amatalaga,” o le saunoaga lea a Tuilaepa.
E le taofia foi pe a tuai ona maua mai le faaiuga o galuega a le su’etusi aua e tatau lava ona su’esu’e lelei ia maea Matagaluega ma Faalapotopotoga a le Malo, ma ia ave foi iai ni fautuaga mo ni vaega e tatau ona faaleleia mo le lelei o galuega fai a le Malo.
E le’o se galuega a le su’etusi le omai e su’esu’e ni mea sese a le Matagaluega, ae e mafua ona faia galuega faa su’etusi ina ia tulituliloa poo a mai tulafono ma aiaiga lea e limataitaina ai galuega faatino a le Malo, poo tausisia le faatinoina o galuega.
O le galuega foi a le su’etusi e le mafai ona faailoa atu i lea Matagaluega le aso ma le taimi e faatino ai le latou galuega, ae e tetei lava ile tutu faafuasei, ma o iina tonu lea e tele ina maua ai le ova a nisi o tagata faigaluega a le Malo. Pei o se faata’ita’iga, ua uma ona faapaleni le tupe a le Cashier e $10,000.00 ae vili atu le latou aiga, ua tuai ona taunuu mai le tupe o le maliu e faatoa taunuu mai ile faaiuga o le vaiaso, o le mea ua tupu, ua le avea e le cashier le tupe e teu ile faletupe ae ua ia tagolima ma fai ai lana pule ile tupe a le Matagaluega e fai ai le latou maliu ma le faamoemoe e lafo mai le tupe mai fafo ile faaiuga o le vaiaso ona toe faapaleni lea o si ana amio, peitai ua tu faafuasei le su’etusi ma fesiligia ana api lisiti ma le paleni o ana tupe, tupu loa iina ma le faalavelave, lea e mafua ai ona afaina avanoa faigaluega a nisi o tagata faigaluega a le Malo.
Afai la ua vave galuega a le s’etusi sili, o lona uiga ua mafai foi ona vave tali atu Matagaluega a le Malo ma ana Faalapotopotoga e tuuina atu faamaumauga o a latou galuega ina ia faatino iai le galuega a le su’etusi, aua e le mafai ona faatino galuega a le su’etusi pe afai ae taunuu atu ise Matagaluega ae leai ma ni faamaumauga ua tapenaina ma atili ai lava ona tuai ona tuuina atu ile Palemene le lipoti a le Su’etusi Sili.
O le isi vaega sa faatuai ai galuega a le ofisa lenei o le Malo ile tele o tausaga ua alu, o le utiuti o le au faigaluega ae e iai le talitonuga ua gafataulimaina e le aufaigaluega o iai nei le faatinoina o galuega fai a le Malo, saunoaga lea a le Alii Palemia.
