O faigafaiva, lafumanu ma faatoaga oni atinae e lelei tele mo le ola ma le soifua lelei o tagata i le itu i taumafa, ae faapea foi i tupe maua mo le tamaoaiga. O nisi o vaaiga i le faaaliga a le au faifaatoaga, fai lafumanu ma faigafaiva i le motu o Upolu mo lenei tausaga 2018

O faigafaiva, lafumanu ma faatoaga oni atinae e lelei tele mo le ola ma le soifua lelei o tagata i le itu i taumafa, ae faapea foi i tupe maua mo le tamaoaiga. O nisi o vaaiga i le faaaliga a le au faifaatoaga, fai lafumanu ma faigafaiva i le motu o Upolu mo lenei tausaga 2018

O le manulauti tauave a soo se Malo o le unaia o le atinae o faatoaga aemaise o lafumanu ma faigafaiva. O ni atinae taua tele i fuafuaga o le tamaoaiga i soo se atunuu e pei o Samoa o loo taumafai i soo se auala e siitia ai le lelei o faatoaga ma faaaoga ai le laueleele o loo tele ina mafiafia i le vao ma laau tetele ae e le’o faato’aina.

O lea ua auina i fafo le uta muamua o le fa’i mai Samoa i le tuanai o le tele o tausaga e le’o toe aveina lea fua tau faatoaga e faatau i maketi i Niusila e pei ona sa iai i tausaga e tele ua tuanai. O se isi lea fua aliali o taumafaiga e toe faaleleia faatoaga fa’i e pei ona toto ai nei le ituaiga o le fa’i Isaraelu ma le fa’i mai Aferika. O le vaiaso ua mavae na taualuga ai le Faaaliga a le au fai faatoaga i lo tatou atunuu mo lenei tausaga. O se faaaliga ua masani ai ona faalauiloa ai seleselega a le au faifaatoaga, faapea faigafaiva ma lafumanu.

Na faaalia e le afioga i le Palemia susuga Tuila’epa L Sailele Malielegaoi, e le tau faailoaina le sao taua o faatoaga i le tamaoaiga o le atunuu aemaise o le fofoga taumafa ia faateleina ma maua pea ina ia aua nei oge. O se luitau lea mo le atunuu atoa e pei ona ave le faamalosi ‘au a le taitai o le Malo e toaaga e faato’a le laueleele aua e lelei lona taunuuga pe a oo ina selesele. Ua lelei auala galue ose isi lea itu taua e lelei ai feoaiga i fanua o loo faia ai faatoaga. Ua taugofie foi taavale afi ma ua lelei auala faapisinisi i nei aso e maua ai se taavale mo se faatoaga, e le pei o tausaga ua tuanai sa faigata seia vagana le au fai faatoaga lima malolosi.

“E leai la se mafua’aga tatau e toe soifua mativa ai se aiga pe toe fia taumafa ai se Samoa ae sei vagana foi i latou o loo olaola noa ma le ola faapaie. O le tiute o pulega mamalu a alii ma faipule ma le lagolago a o tatou ta’ita’i faaleagaga e laugaina le talalelei ma fai foi faataitaiga lelei i le soifua ai i le upu tala’i ona palataiso ai lea o lo tatou soifua o aso uma”, na saunoa ai le Palemia i le tatalaina o le faaaliga i Upolu. O le faaaliga sa fuafua e tatala i le aso Lulu na tea nei ae na tolo i le aso Tofi ona o se faaiuga mai le taitai o le Malo le afioga i le Palemia, ona o le aso lulu o le fono a le kapeneta e ave iai le faamuamua a le Malo.