O le Aai o Kalaesetete na usuia ai le fonotele faaletausaga a le FAGASA i le Aso Lua talu ai, aso 22 o Aperila. Na amataina le fono e pei ona masani ai faatasiga uma a Samoa i le lotu na saunia e le Afioga i le Taitaifono a le Fono Samoa le susuga a Fitifiti Luatua, ona sosoo ai lea ma le ‘ava o le feiloaiga na tapenaina e sui o le fono Faufautua ma le lālā i Kalaesetete faapea ma faleupolu o le itu tali.
O le afioga i le Komesina Sili o Samoa, a o le Faatamā foi o le Faalapotopotoga o le Aoaoina o le Gagana Samoa i Aotearoa, le afioga ia Leasi Papaalii Scanlan na saunoa loa e tatala aloaia le fonotele lona 23 a FAGASA i lenei tausaga. O se fonotele sili lenei ona toatele ni tagata faasoa (fai pepa) nai lo tausaga e tele ua mavae. E 15 fetufaaaiga na faatinoina mai Aoga Amata faasolo atu ai lava i Tulagalua, kolisi ma sui o Iunivesite ma Politekinika.
O le lauga na aami le Fetalaiga ia Telei‘ai Christian Ausage na fetalai e tatala ai faasoa o le uluai aso o le fonotele. O se pepa na saunia lelei ma na toatele foi le auusufono na lagona le fiafia i le ‘oa o le gagana faamatai na fetalai i ai le Ta‘iulu o le Gagana ma Aganuu a Amerika Samoa. Sa faasolo ai loa ma le tele o pepa i le uluai aso.
O le Aso Lulu na tatala i le faasoa a le Afioga i le Taitaifono Aoao a le SAASIA le afioga ia Sala Faasaulala Tagoilelagi-Leota ma faapea foi ona faasolo mai isi pepa o le taeao lava lea ona sosoo ai loa lea ma le tatalaina o le uluai tusi a le FAGASA.
(silasila i le tala o loo tusia i le Sooatulau) O le Aso Tofi na toe faasolo ai fetufaaiga ma o se tulaga na maoa‘e foi le faafofoga a le auusufono ina ua faasoa le tina matua ia Ana Mele Fonoti e uiga i le Nuaga o le faiga lea o le lega, lea e fai ai le samaga o tatau a tama tane.
Na faaiu fetufaaiga o le fono i le pepa a le Taitaifono Aoao na faatinoina ai ni metotia fou e ala i pesega/musika mo le aoaoina o le gagana Samoa i potu aoga.
