O le sauni atu i le faamanatuina o le ANZAC Day, ae gasolo ai foi ma le fonotaga a le PIC a Niu Sila, lea sa amata usuia i le Aso Tofi, 24 o Aperila. O Pulega uma i Aukilani e lavea ai Matu, Saute ma Sisifo sa auai uma i lenei fonotaga. Sa faatasi mai ai foi sui o ekalesia mai i Kalaiesetete ma Ueligitone.
Na tatala lenei mafutaga i le sauniga lotu lea sa faataunuuina i le malumalu o le ekalesia PIC i Niutone, ma o le matagaluega foi lea sa faatinoina uma ai polokalame o le fono.
O le mae‘a ai o le sauniga i le taeao ona sosoo lea ma le faagasologa o faaevagelia na saunia e pulega taitasi, faatasi ai ma isi mataupu o le fono auā le agai i luma o le galuega a le Atua. O le afiafi o le Aso Tofi o le po lea sa faapitoa mo autalavou e faatinoina ai a latou faaevagelia.
O le taeao o le Aso Faraile sa toe faaauauina ai mataupu o le fono i le malumalu lava o le ekalesia PIC i Niutone, a o le afiafi na see atu loa i le ekalesia PIC i Avondale mo faafiafiaga.
O le Pulega a Saute sa latou tatalaina fiafia o lea po i le latou pese Samoa, mauluulu faatasi ai ma le taualuga.
E lē toatele ni sui na malaga mai i Kalaiesetete ae sa vaaia le matagofie o latou tapenaga i le latou mauluulu faapea le latou taualuga. O le Pulega toatele sa iai o le itu i Matu lea sa matuā faatumulia ai luga o le stage ma totonu o le fale i le latou faafiafiaga. Na mataina tapenaga a Pulega taitasi faapea foi ma latou togiga.
O se tasi vaaiga tāua o lenei polokalame o susuga i faafeagaiga ma o latou faletua sa taulamua i le faatinoina o aitema taitasi, aemaise o le faatāuaina o faafiafiaga faa-Samoa e pei ona iai mauluulu, pese faapea ma taualuga.
O le taeao o le Aso Toonai o le aso mulimuli lea o le mafutaga, na faamae‘a ai mataupu uma o le fono ma fai ai ma le sauniga faaiu e tapunia aloaia ai le fonotaga o lenei tausaga.
