Foai le Iuni a Europa i tapenaga a Samoa

E 4.6 miliona euro, latalata lea i le $20 miliona tala Samoa se tinoitupe na sainia i le faaiuga o le vaiaso na tea nei e le Komesina o Atina‘e a le Iuni o Europa, o Andris Piebalgs ma le Palemia o Samoa, Susuga Tuilaepa Lupesoliai Sailele Malielegaoi.

 
O lea tupe ua foai atu e le Iuni a Europa mo sauniuniga a le Malo o Samoa i le taligamalo o loo alo atu i ai mo le fono a atunuu laiti tau atia‘e a le lalolagi le SIDS lea e faia i Apia i le masina o Setema o le tausaga nei.

 
O se sainigalima na faaiu ai le asiasiga a lenei taitai, faatasi ai ni sui o le Faletupe o Atina‘e a Asia ma le Faletupe o le Lalolagi, atoa ai le Minisita o le Va i Fafo a Niu Sila, o Murray McCully.

 
O le faamatalaga a le alii Komesina o Atina‘e, o se fesoasoani lenei a lea faalapotopotoga ona ua mautinoa le tele o le fesoasoani o loo moomia e Samoa i le faamautu ai o se taligamalo lelei ma le saogalemu ia Setema.

 
O se fono o le a faapea ona auai mai ai foi le Iuni a Europa ona o le tele o mataupu laga i lea fonotaga o atunuu laiti o le lalolagi e moomia lava le fesoasoani a malo tetele ma o malo tetele nei o Europa o le a faapea ona agai i ai le tele o talosaga a malo laiti nei.

 
O le asiasiga na faatautaia i Samoa e pei ona auai mai ai Piebalgs o le vaai lea i le faagasologa o galuega o loo galulue faatasi ai ma le malo o Niu Sila i le atina‘e o malosiaga faalenatura mo le gaosiga o le Eletise.

 
O se isi foi fesoasoani a Europa na ave i le Fono a Malo o le Pasefika atoa ai ma le $14 miliona tala mai le malo o Niu Sila lea ua fausia ai nofoaga e pue ai le malosiaga o le la ina ia mafai ona faaopoopo le eletise e maua mai i auala faalenatura ia.

 
O le asiasiga na agai ai i le nofoaga e pei o le malaetutuu i Tuanaimato lea ua faatū ai le isi nofoaga faapea e apo ai le malosiaga o le la (solar power panels). E lē gata i lea o le faletaalo lona tolu i Tuanaimato lava ua faapipii ai foi isi meafaigaluega faapea. O le galuega a le EPC le malosiaga tau Eletise, ua mautu ai nei nofoaga faapea i Tanugamanono, Vaitele faapea ai Salelologa.

 
O le isi nofoaga na asia o le vaega o loo faapea ona gaosi ai le eletise mai i le suavai i le Loto o Samasoni i Malifa.
Sa faaiu le asiasiga i le ofisa fou o le Iuni a Europa lea na tatala aloaia ai i le oo atu o ia taitai ma o se tasi o pine faamau na ta‘ua e Piebalgs ua saga faamausali ai le faatinoga o galuega fesoasoani a le Iuni i totonu o Samoa ma ona tuaoi.

 
O le faaiuga lava o le vaiaso na faaauau ai le asiasiga lenei i Tuvalu, Kiripati ma le Atu Kuki o isi atunuu ua faamautu ai le atina‘e lenei o le gaosiga o le eletise mai i le malosiaga ua maua mai i le lā.

Palemia ma le Komesina o Atina’e a le Iuni a Europa  .Palemia ma le Komesina o Atina’e Malosiaga Andris Piebalgs