Ua moni upu a le Tusi, ‘O le mea ma lona tausaga i mea uma, ma ona po i mea uma…. o ona po e atiae ai, ma ona po e lepeti ai. O ona po e ataata ai, ma ona po e tagi ai.’
E lei afea e se finagalo o soo se tasi sa alafai mai i lea Aso Lua, aso 22 o Fepuari 2011, faapea o loo iai se mala o faalolo‘i mai ma se ao pogisa o le a ufitia faafuasei ai Kalaiesetete i lea lava aso matagofie.
Na alafai mai alo ma fanau i fanuga lelei, a o tapena e tina o latou lavalava mo le aoga, aemaise nai sauniuniga mo taumafa i taimi o a latou malologa. Sauni foi tina ma tamā mo tiute masani i lea aso e pei o isi aso uma o le vaiaso ma le soifuaga.
O nisi i galuega totogi, o nisi i galuega a ekalesia. Aemaise foi i latou o loo nafa ma le fatuaiga o le faamaopoopoina o meafai i le fale auā le taliu atu o le au aooga ma le au faigaluega.
Ua ta le 12 i le aoauli, o le taimi masani e fai ai sina koma a le au faigaluega mai le mamafa o galuega i le ‘afa o le taeao, ae tainane sina taumafa e tali ai le laualo auā sina faasiliga malosi e faamae‘a ai galuega o lea aso.
Ae pagā lea, ua lē ogatusa fuafuaga a le tagata soifua, ma gaioiga a le eleele ma le papa o faavae o le lalolagi.
O foliga maopoopo ma le toafilemu o mea uma i lena ‘afa o le aso i Kalaiesetete, na faafuasei lava, e pei o le emo o le uila ona suia e avea ma mala sauā, ua fano faafuasei ai le anoano o soifua o nisi o tamā, tina, uso, tuagane, tuafāfine, talavou, aemaise nai alualutoto e toalua.
O se vaaiga faamomoiloto e matamata atu i luga o televise ma faalogo atu i leitio, a o feei ma uiō nai tagata ma taufetuli solo mo se lafitaga. O se vaaiga e lē masani ai Niu Sila, a o vaai atu i le solofa saosaoa ifo o fogafale maualuluga ma nuti lilii e pei o se tioata manifinifi.
O ni vaaiga o le a faagalo gata i le loto, aemaise mo i latou na tofo moni i le sauā o le mafuie.
Ua lagona le lē mautonu, ua leai se fiafia e toe latalata i le aai, ae i le taimi e tasi, o loo ootia lagona loloto, i le alofa atu i nai tagata o loo tanumia pea i lalo o faaputuga sima tetele.
O vaaiga na o loo iai pea i le tele o vaega o le aai o Kalaiesetete. I le vaiaso fou pe a aulia, o le a avatu ai se atoaga o lipoti uma mai lenei faalavelave, aemaise lava ni auiliiliga o le tulaga o loo iai nai o tatou tagata Samoa i Kalaiesetete, ma nisi foi o ata o loo taumafai le sui o le Samoa Times e pue mai, auā le faamaoniga o mea tonu o loo tutupu.
O le taimi o lenei lipoti, o loo iai pea i faamaumauga e na o le toatasi si alo o Samoa ua maumau ai lona soifua i lenei mala faalenatura, le susuga Jeff Sanft. Na maua se feiloaiga ma se tasi o aunt o le susuga Jeff, ma ia ta‘ua ai, e lē o tele ni faamatalaga o faamamulu mai i tua i le taimi nei, e tusa ai o le atalii, ae pe a tusa ma fuafuaga faataatitia a le aiga ma le malo, e ono faia lona falelauasiga i le Aso Tofi o le vaiaso nei, ma toe maua mai ai se isi lipoti atili i lona soifuaga, auā la tatou lomiga o le vaiaso fou.
Ae i le Radio Samoa i le vaiaso talu ai ma lenei foi vaiaso o le a faasolo, o loo fai pea ma fesootai atu i ona sui o loo galulue fita mai Kalaiesetete, auā le logologo mai o nisi o tala fou i le tulaga o loo iai le faalavelave, aemaise lava i le fesootai atu i o tatou tagata Samoa i le la itu.
Tau ina ia faamaise le agaga o Ieova le Atua o faamafanafanaga, i nai aiga, o mātua, fanau, uso ma tuafāfine, ua motusia faafuasei le mafutaga ma ē pele ua faamuta lo latou soifua ona o le mafuie matautia, ua masofa ai faavae papa o le Aai o Fugalaau mātala.
