Na faatumulia ai le Campbelltown Arts Centre i le mamalu o le atunuu ma isi atunuu i le po o le Aso Faraile ma le Aso Toonai talu ai, i le faaaliga o le tala faatino logologoā e manatua ai pea se tasi o taitai iloga o Samoa i vaitaimi o pulega faakolone a Niu Sila i Samoa le afioga i le Tama Aiga ia Tupua Tamasese Lealofi III. O i latou e aumau i Niu Sila ae ua masii mai e faailoa la latou tala i Ausetalia nei.
O lenei tala lauiloa e silafia e soo se Samoa talu ai le sao o le Afioga ia Tupua Tamasese Lealofi III i le taitaiina o le solo filemu agai atu e faatali sui o le Mau na toe faafoi atu i le faatafeaga mai motu o le Pasefika i Malesala ae tagatavaleina ai loa e fitafita a Niu Sila i le alatele i Apia, lea na mavae ai i ona tagata ma sui o le Mau ia aogā lona maliu auā le sailiga o se saolotoga o Samoa mai pulega faakolone a Niu Sila.
Sa vaaia le faatumulia o Brisbane i le aso 19 i le faaaliga muamua o lenei tala i le taimi aupito sili ona tāua i le auala o Samoa i le tutoatasi na ausia i le 1962. Ae na sosoo e Sini lea matatia ina ua siitia mai le nofoaga laitiiti mai Parramatta agai mai i le Campbelltown Arts Centre.
O le afioga ia Pulotu Canada Alofa McCarthy na ia Tusi ma faatonutonuina lenei faaaliga lea na faatinoina ma le sini ia faamanatu ma faatāua ai lo tatou faasinomaga ma le talafaasolopito ae ia silafia ai foi e le tupulaga talavou ma le lumanai le tāua o le faigata na feagai ma o tatou tuaa auā le sailiga o le filemu ma le saolotoga ua soifua ai nei.
O nisi na auai i le faatinoina o lenei tala e aofia ai le tamaitai ia Aumua Toafa Ai‘i Te‘o sa avea ma Losa le Tina o Sinalei. O le tamaitai o Sinalei sa faatinoina e le tamaitai o Christina Api Ulugia.
O le alii o Josh Scott na ia tauaveina le itu a Richard Wallace. O lē o maua e le nusipepa i le taimi nei lē na faatinoina le vaega a Asosa. O vaega a Lauaki, Tagaloa, Iakopo ma Tapu sa feagai lea ma le alii talavou ia David Tua.
O le susuga ia Simon Ah Him na faatautaia le pitolaau a le Afioga Faumuina ae peitai o Damon Tua sa fai lea ma tama autu i le vaega a le afioga ia Tupua Tamasese Lealofi le III. O le faletua ia Oketi Taualaga ma le afioga Vaifale Lupematasila Tai Taulaga,Victoria Auafa Tuiono faapea Brian Tonumaipea Tuisila na avea ma sui faailoa ma maketiina lenei faaaliga iloga ua maimoa ma silasila i ai Samoa i Ausetalia.
