Ua faagasolo nei le galuega a le ofisa o faigapalota i afioaga o le atunuu ina ia mautinoa e oo atu i le taimi o le faiga filifiliga a le atunuu ua mautu uma lesitala ua faatulafonoina mo le au palota.
O le vaiaso lenei, o afioaga o Letogo, Vailele ma Fagalii i le itumalo o le Vaimauga lea na faatautaia ai le galuega o le faagasologa o lesitala o le au fai palota.
O le vaiaso atoa o loo afea ai lea itu o le tasi lenei o itumalo tele i totonu o Samoa i le lola o faigapalota.
O le lola lava ia o le faigapalota o lenei tausaga ua ta‘ua e le Ofisa o Faigapalota e latalata pe sili laititi atu foi i le toa 10,000 le au palota o lea faatoa palota mo le uluai taimi.
O le unai ina ia vave ona lesitala uma i latou ua faapea ona sauni atu mo le faiga filifiliga a le atunuu.
E tele foi suiga ua faatulaga mo le palota o le tausaga fou auā o lea ua iai nofoa faaopoopo aemaise o le vaeluaina o itumalo faaalalafaga mo le palota lava ia ina ia mafai ai ona tasi lava le nofoa a le itumalo faaalalafaga ae lē toe tailua i itumalo tetele e pei ona alu ai i le taimi lenei.
O le tasi la lenei o itumalo e lua ona nofoa i le Palemene, o le itumalo lea o le Vaimauga i Sisifo e lua ona nofoa ma le Vaimauga i Sasa‘e e toatasi.
O lea foi e iai le suiga o nofoa o palota taitoatasi lea o le a faaigoaina o le lola a le Taulaga, e pei ona talanoaina ai i luma o le Palemene.
O le faamamafa o asiasiga o lenei vaiaso o le faatino o lesitala fou ma le toe faafou o lesitala ua silia i le 10 tausaga e lei toe suia ma ua faatulafonoina ai le tatau i tagata uma e lei toe suia lesitala talu mai lea taimi ona toe tapue o latou ata ma a iai nisi suiga i faamatalaga o pepa o faigapalota e tatau loa ona faatino i le taimi lenei.
O se auala ua faamalamalama atili ai suiga ua iai nei faaletulafono o le faagasologa o palota o le tausaga fou.
E faatulafonoina le tatau i tagatānuu uma o Samoa ua aulia le 21 tausaga le matutua agai i luga ona fai lesitala mo lenei faiga filifiliga ma o se auala lenei ua nofo malamalama ai foi pulega a alii ma faipule o afioaga uma i le tāua o lenei vaega o le faiga filifiliga a le atunuu i le tausaga fou e pei ona talosagaina ai lo latou tau‘au ina ia mautinoa e agai uma ane tagata lesitala e faatino le lesitala.
E faagasolo le galuega a le ofisa o faigapalota ma mafai ona tali atu i fesili moomia a le atunuu i itumalo uma o Samoa.
