Alex Leapai & Sonny Bill Williams
O se tala fiafia i le fusuaga ase tasi o alo o le atunuu ia Alex Faataui Leapai, e na o le 2 minute, 27 sekone ae fa‘alo mai loa le alii Amerika o Matt Hicks e sili pe a faagata lea vaega.
E ui i se umī sasa‘o ma se lelei foi o le fusu a le alii mai Amerika peitai na faatolu ona faatotolo e Alex ma na sili atu ia Alex le faamalie o le aumaimoa ae tatope loa ma fai motu auā e lē tatau na malo se moa folau.
O lea fusuaga o se fusuaga faasamasamanoa ma e feololo sina seleni na manumalo ai Alex i le po o le Aso Faraile aso 8 o Fepuari.
Mo le silafia, o Alex ua i le numera sefulu pito i luga i le fusi o le WBO a le lalolagi, ma e 5 fusi o loo ia umiaina i le taimi nei.
E pei foi ona silafia, i le taaloga a le isi alo tautaua o Samoa, le susuga ia Sonny Bill Williams ma le alii mai Aferika i Saute, Francois Botha, e pei lava ona maimoaina e nisi le faagaulemalie o le aumaimoa ina ua faamuta faafuasei le taaloga i le taamilosaga 10 ae ua mae‘a na saini le konekarate o le 12 taamilosaga.
E ui foi i se tautaua o le alii o Francois e tusa ai ma le 60 ana taaloga, ae na o le 6 taaloga a SBW ae o le tala fiafia na manumalo lava Sonny Bill Williams i ‘ai e ui sa lei atoa taamilosaga e 12.
Momoli atu foi le faamalo i le tapuaiga a le atunuu i soo se tafa o le lalolagi. Faamalo foi i nai alo o le atunuu sa taaalo i lea po faapea le alii taalo lakapi ia Quade Cooper na faamanuiaina foi lana uluai fusuaga i lea afiafi.
