Na vaaia le faalii ma le toatamai o le alii o Francois Botha i le la fusuaga ma Sonny Bill i lona tu‘ia o le alo o Samoa e ui ua ta le logo ma o le taimi lena na iloa ai ua lē taulau faasalalauga a le alii Aferika lenei i lona faaumatia o Williams i lea fusuaga.
Na mataina le fusuaga i le amataga o le tau fai tu‘i ma finau. Na manatu le toatele e leai se avanoa o Sonny i le loa ona fusu o Botha ma malolosi siamupini muamua na latou fetaui e pei o Mike Tyson ma Holyfield.
Pau le auupega na faamoemoe i ai Sonny Bill o lana mānava ma le talavou luasefulufitu ona tausaga i le fāsefulufā o le alii Aferika i Saute. Na faaaogāina lelei lava le soatu‘i a le alii Samoa nei, aepeitai o taamilosaga faaiu na amata vaaia ai le pipii atu i ai o Botha ma taumafai e tu‘ioti.
O le taimi lea i pepa a alii faamasino ua leva ona sili mai ‘ai o SBW mai taamilosaga amata. E ui e na o le lima ana fusuaga ae laasia lenei manumalo moomia mo lana taumafai i fusuaga faapolofesa, ae lei māmā ai foi ma faitioga a nisi na manao e TKO lenei alo iloga o Samoa. Na faailoa lava e nisi o tagata i luga o Leitio ma le Facebok le toeitiiti lava malolo Williams ma fautua ai e tatau ona tuu loa lana fusu. O nisi lava fanau Samoa na pei e saunoa e leai se avanoa o Sonny pe a toe fetaui ma se isi tagata e lelei atu nai lo o Botha. Ae peitai e talitonu nisi o le atunuu ua matuā tele se lumanai lelei ua ataata mai mo ia. Ua atili mafanafana ai ma le fesoasoani tele a le alii iloga ia Anthony Mundine mo Sonny Bill aemaise foi fautuaga faaleuso a Toaletai David Tua i taimi e moomia ai e Sonny Bill Williams ma Khoder Nasser a o tapena mai i ana fusuaga ua tuanai.
O le mafanafanaga lea o loo talitonu ma lototele ai Sonny Bill Williams e iai lona avanoa i le faagatama mo le lumanai e ui lava e toatele i latou e faalele tala e na te lē mafaia nisi o tama fusu lelei.
