E taalo faatausala, e finau i le lotonuu, e malolo faatamalii; e malo lava oe Manu Samoa i loto o ou tagata, auā ua e siitia lona tulaga i lenei lalolagi. Faamalo fai o le faiva!
Na mae‘a loa le taamilosaga i Ueligitone, lele loa le Manu i Las Vegas e faasauni ai mo le taamilosaga na se‘i mavae atu nei.
E tolu aso sa faagasolo ai le taamilosaga lakapi taitoafitu i le faaiuga o le vaiaso, aso 8, 9 ma le aso 10 o Fepuari. O se taamilosaga umi, pe a fua atu i isi vae o le taamilosaga taitoafitu e masani lava, e na o le lua aso e faia ai.
E sefulu ma le ono ‘au lakapi taitoafitu faavaomalo na finauina le manumalo o Las Vegas, e aofia ai ma le ‘au a le Manu Samoa i lenei tausaga. O le faatulagaga lenei o ‘au ma Pools taitasi sa taaalo ai:
Pool A Fiti, Sikotilani, Portugal ma Egelani
Pool B Aferika i Saute, Kanata, Kenya ma Uruguay
Pool C Niu Sila, Uelese, Argentina ma Farani
Pool D Samoa, Ausetalia, Spain ma USA
Sa manatu le toatele o le vae lea o le taitoafitu i Las Vegas i Amerika, o le a toe faasasa‘o ai apaau o le Manu mo se isi avanoa e toe lele mai ai ma le Ipu Autu o le manumalo.
Peitai, ua na o ni moomooga lava ua lē taulau, ina ua lē manuia ma malolo i le Semi-final muamua o le ipu autū, na taaalo ai ma le ‘au a Aferika i Saute.
E telē le avanoa sa tatau ona manumalo ai ia Aferika, peitai, e tau fai malolosi uma ‘au, ma e finau foi le puipui mai a Aferika latou. O nai minute mulimuli lava o le taaloga, o loo tutusa pea ‘ai a ‘au e lua. Manu Samoa 7 vs 7 Aferika seia mae‘a lava le taimi.
Na toe faaopoopo minute o le taaloga, ma laasia muamua ai loa e Aferika le laina sikoa ma manumalo ai i ‘ai e 12 Aferika ae tumau pea ‘ai o le Manu Samoa i le 7. O le Semi-final lona lua o le ipu autū, na saili siamupini ai le ‘au a Niu Sila ma Fiti, manumalo ai Niu Sila 19 i le 14 a Fiti.
O le Manu Samoa o se tasi o ‘au e lei iai se faia‘ina i ana taaloga uma e tolu o Pool Games, talu ona faagasolo le taamilosaga.
E ui lava la ua le ausia le Ipu autū o lea vae, ae o se iuga faafiafia loto ina ua mae‘a ane lea taamilosaga i Las Vegas, ua tulaga tolu ai le Manu Samoa i le faatulagaga o ‘au a le lalolagi o le lakapi Taitoafitu.
Na faamaonia lea faaiuga ina ua manumalo le Manu Samoa i le ‘au a Fiti, i le sailiga o se ‘au e tulaga tolu i le taamilosaga, Manu Samoa 36, Fiti 31.
O le iuga i lona aotelega e pei ona silafia, na saili ai e Niu Sila ma Aferika le manumalo mo le Ipu autū o le taamilosaga taitoafitu i Las Vegas i le 2013. Na manumalo le ‘au a Aferika i Saute i ‘ai e 40 ia Niu Sila e 21.
O le iuga la lea o le taamilosaga lakapi taitoafitu i Las Vegas i lenei foi tausaga:
Ipu Autu (Final Cup) – Aferika i Saute
Ipu Mafolafola (Final Plate) – Kanata
Ipu Faaofuofu (Final Bowl) – Farani
Talita (Final Shield) – Ausetalia
Manu Samoa tulaga tolu i le taamilosaga i Vegas i le faasologa o ‘au a le taitoafitu.
Faatulagaga ua iai nei:
Niu Sila – 96
Aferika – 73
Samoa – 71
Fiti – 66
Farani – 59
Kenya – 57
Argentina – 53
Wales – 44
Egelani – 42
Kanata – 39
Ausetalia – 35
Sikotilani – 33
Iunaite Setete – 28
Portugal – 23
Sepania – 23
Tonga – 3
Uruguay – 2
Zimbabwe – 2
Rusia – 1
O le upu masani lava, e toe oso fo’i le la, e toe lele foi le Manu. O loo iai taamilosaga a le ta’ito’afitu o loo mulimuli mai, e telē le avanoa e saili siamupini ai le Manu Samoa, mo sona tulaga lelei i lenei foi tausaga;
Hong Kong 22-24 Mati, Iapani 30-31 Mati, Sikotilani 04-05 o Me ma Egelani 11-12 o Me.