“Ua tutuli ma faamalolo ona o le lē faia o o la tiute”
Na muamua faapea mai le faamatalaga a leoleo na mafua ona maliu le alii Niu Sila o Hans Dalton i le falepuipui i Tafaigata ona sa pule i lona ola, ae na alu alu suesuega ae toe faapea mai na faaoo i ai e se tasi o pagota le maliu.
O leoleo na tiute i le falepuipui na suesueina i se sailiiliga faalotoifale a le matagaluega o leoleo ma falepuipui, ma molia ai loa ni alii leoleo i le faatamala i le faatinoga o o latou tiute. O le toalua o leoleo na la ioeina le faatamala i tiute ina ua tutulai i le faamasinoga faaleoleo le Police Tribunal.
O le faaiuga ua faia i ai o le tutuli ma faamalolo ua lē toe galulue. O le isi leoleo e toatasi o loo tetee i le moliaga o le faatamala i ona tiute, ma ua sauni e tuuina atu ni ana molimau e lagolago ai lana tetee pe a valaau lona moliaga i le faamasinoga faaleoleo.
O le taunuuga o suesuega faalotoifale lea ua tutuli ai leoleo o le falepuipui e toalua ae faatali le tetee a le isi toatasi, o se isi lea laasaga o suesuega na faia e mafua i le teena e le aiga o Hans Dalton o le mafuaaga na faailoa muamua e leoleo e faapea na pule le alii i lona ola.
E leai se faamatalaga a le sooupu o le matagaluega o leoleo o toe faamatala mai ai pe aisea na faia ai le faaiuga muamua o lē na maliu lea na maua i totonu o se kalone vai, na pule i lona soifua.
“O lea lava la ua iloa nei o le faatamala lava o nisi o leoleo na tiute na mafua ai le faalavelave”, na saunoa mai ai le sooupu le afioga i le Komesina lagolago o Leaupepe Fatu Pula.
E le o mautinoa pe na o le toatolu leoleo o le falepuipui ua aafia i se faaiuga o suesuega na faia ma molia ai i moliaga o le galuega faaleoleo o le faatamala i le faatinoga o tiute poo le negligence of duties.
O le toe suesueina o le tino maliu o Hans i Niu Sila ona o se manaoga o lona aiga, na iloa ai e lei pule o ia i lona ola, ae na faaoo i ai e se isi ni manu‘a le mafuaaga o lona maliu.
E lei tuanai ni vaiaso na faailoa ai lea faaiuga, ae faailoa e leoleo i Samoa ua molia se alii pagota i le fasioti tagata faamoemeoina e fesootai ma le faalavelave. O loo teena e le alii pagota o Jonathan Patrick Chrichton le solitulafono ua tuua‘ia ai ma o loo faatali le aso e toe tulai ai mo le suesueina o molimau a leoleo.
O loo tele nisi o faamatalaga ua salalau e faatatau i le mafuaaga o le maliu ma lē na faia, peitai o le a tālia le faamasinoga o Jonathan o se alii talavou o Malifa, o le a maua ai se isi taunuuga o lenei mataupu.
O Jonathan o loo tuli lona faasalaga soloatoa ina ua faamaonia le isi ona moliaga o le fasioti tagata faamoemoeina e mafua i lona faaoo o le maliu i se alii ave taavale laititi laupasese poo se taxi.
