Ua amata nei ona faailoa mai e nisi o le atunuu o loo totō a latou maukeni i le tauvaga totō maukeni a le Lima Ola, le tulaga ua oo i ai a latou maukeni na totō. O se lagona fiafia le vaai atu ua lauolaola ma amata foi ona fua mai le laau e pei ona agai i ai le tauvaga.
O le susuga ia Saitia Faletolu, o ia lava na muai oo mai le ofisa o le Radio Samoa ma lesitala lona suafa mo le tauvaga ma tauaao ai loa lana pepa o fatu maukeni se‘i tulou, mo le totōina.
Ae pei ona silasila atu i le ata, o lena ua amata ona ola lauusiusi le maukeni a le susuga Saitia, ma o lana faamatalaga, ua amata foi ona totogo a‘e fua o le maukeni.
E pei ona faamautinoa atili mai e le susuga Tuilaepa Reupena Kovati, o ia o loo faaulu i ai le faatautaia o lenei tauvaga, o le taimi nei ua amata ona unaia i latou uma sa ave fatu maukeni, afai ua tupu lauolaola ma sosolo le maukeni, ua manaia foi le pue mai loa o ni ata o maukeni, ma auina mai e faalauiloa i le nusipepa ma luga o le itulau facebook a le Samoa Times.
O le a faamatala ai foi e i latou nisi o itu ua aogā ma lelei ai lenei tauvaga mo latou ma o latou aiga. Afai foi ua fua maukeni, ua atili ai ona matagofie le ata e mafai ona auina mai. Peitai mo le faatinoga lava ia o le tauvaga, e faatoa faamasinoina uma fua o maukeni, i le aso ua faatulaga, o le faaiuga o le masina lenei o Fepuari, lea o le a oo uma mai ai sui tauva ma se fua o lana maukeni, e silasila i ai le au faamasino.
E ese mai ia i latou sa lesitala o latou suafa i le tauvaga, ae na oo mai foi se tasi o tina ma si ona alo, e fia faaoo mai foi le ata o le latou maukeni sa totō, e ui e lē o ni fatu na auina atu i le ofisa o le polokalame, ae o le agaga o le fiafia e faatino lenei galuega lelei, na mafua ai ona agai le tamā o le aiga ma faatau mai le maukeni, ma amata totō ai lava e latou fatu maukeni, i le vaitau tonu amata ai foi lenei tauvaga.
O le faagaeetia la o le tina ia Pa‘i Asiata na oo mai ai lava e faaoo mai le ata o le maukeni a le aiga ua fua, ma faaoo mai le latou faafetai, ua avea le taulagalaga a le polokalame, ua latou molimau ai, e lē faigata lava le sagai o tatou e totō a tatou lava taumafa e faaaogā i ai o tatou tuafale ma sefe ai foi nisi seleni pe a oo ina selesele mai nei faatoaga, aemaise ai le maua fua e aunoa ma se tupe faaalu.
O le vaiaso fou o le a auina atu ai se tala a le Aoga Amata o le Leataata Tupulaga, ma le ata o le maukeni o loo totō e nai fanau aoga, faapea foi nisi maukeni e faaoo mai i le ofisa.
