Talu ai le faigata ona toe foi aiga i le tulaga ua ola ai nei, aemaise lava i fanau ma a latou aiga, … o le a agai ai le nuu e faaaogā le cashpower ae o le a faatali poo fea o le a fai i ai tuutuuga ma folafolaga a le Malo…
Ua tali Magiagi i le mae‘a ai o le vaiaso atoa o tuu mai le tuutuuga a le Malo e lē toe foi lava i se isi tulaga le finauga a le Malo; a lē ioe lava aiga i le cashpower e lē toe faaola atu le eletise i le tele o aiga. O le taimi lenei na faaalia e le Palemia ua toatele lava aiga ua agai i le cashpower ona ua fia ola le eletise, ua a‘e foi aoga a le fanau ae o loo pogisa lava le nuu talu mai le afā o Eveni.
O le faamatalaga a le nuu talu lava ona amata mai feutagaiga ma le manaoga o le Malo ina ia totogi le aitalafu ma ia ola i le cashpower Magiagi, e 18 fale ia ua ola i le cashpower ona o tagata ia na ola sa‘o mai lava i laina eletise o latou fale auā o maota fou na fai ua leai ni mita tuai ma na leai so latou manaoga e agai e fai le cashpower.
O isi aiga ia ua toe ola o latou fale talu mai le afā na toe ola mai lava laina ma ua tase‘i e le EPC fuses poo pine na sau ai le eletise mai i laina nei ae toe agai le tele o fale nei toe faatau fuses poo pine ia ona faapipii ai loa lea o le fesootaiga o le eletise mai i laina eletise ma agai atu ai i o latou fale.
O tagata nei e iai matua tausi i o latou aiga ae o le tele lava o fale ua faapea nei ona mumū i moli fagu ma moli matagi talu mai le faaiuga o le tausaga.
“O le faiga lea ua agai i ai le Malo ua faaaogā puapuaga o tagata e unai ai lona manaoga ae o lea lava e oo mai i le taimi lenei e leai ma se taui lava ua faia faasaga i lenei nuu.
Ua 92 tausaga o faaaogā fanua ma vaitafe e sau mai i Magiagi – ua faafia ona fai maliega ma le savali ai le Malo ae o matou lava lea e leaga i faamatalaga a le Malo ua faalele ma faasalalau,” o le faamatalaga lea a se tasi o matai o le afioaga o Magiagi o loo i totonu o le komiti a le afioaga ia e faatino feutagaiga ma le komiti ua tofia e le Malo o Ugaena Anisi Tua.
“E leai lava ma se taui ua aumai ae ua faafia ona totogi Satapuala, faafia ona totogi Salelologa ma isi mau nuu ua faaaogā o latou eleele, ae o Magiagi e augapiu lava ma se taui – e pei lava le faiga o le nuu lenei e lē o iai ni tagata ola”.
Faaalia e Ugaena o le mafuaaga lava lea o le finauga a le nuu, ina ia aveese le aitalafu lea e fai mai le Malo e tatau lava ona totogi ma faapipii le cashpower.
“E oo mai i le asō e lei mafai e le EPC ona faamautu mai le aitalafu a lea aiga ma lea aiga ae o lea lava o le a faamalosi mai le aitalafu”.
Talu ai le faigata ona toe foi aiga i le tulaga ua ola ai nei, aemaise lava i fanau ma a latou aiga, ae o le faamatalaga a le afioaga o lea o le a agai e faaaogā le cashpower ae o le a faatali poo fea o le a fai i ai tuutuuga ma folafolaga a le Malo auā o loo masalosalo le nuu e amata loa le cashpower leai loa foi ma ni folafolaga nei e taunuu e pei lava ona faia i le afioaga i tausaga ua tea.
O le faamatalaga a le Malo e ioe uma loa le nuu e cashpower amata loa ona solo i ai faamanuiaga ae e totogi lava le aitalafu faatasi ai ma le cashpower.
“E faigata tele ona finau atu le tulaga e tatau ona iai feutagaiga ma le Malo ae ua lagona e le tele o aiga le faigata o le taalo lea ua taalo mai ai le Malo ma ua moomia e fanau ma tagata matutua le eletise ma e ui lava o lea ua faaaogā le afaina o le nuu i le afā e taalo mai ai le Malo, ae faamuamua lava le manaoga o tagata o le afioaga,” o se faaaliga lea a Ugaena.
O le faiga o le totogia o le cashpower, a totogi le $20 e alu sa‘o lava le $10 poo le ‘afa o le tupe lea e totogi e le aiga Magiagi i le aitalafu ae maua na o le $10 e ola ai le eletise.
O le vaiaso lenei e tatau ona amata ai le faaola i le cashpower fale ia e lei maua lava le eletise.
O le vaiaso foi lenei e tulai ai i luma o le Faamasinoga aiga ia na agai toe faatau fuses ae faaola ai o latou fale.
