E talanoa loa le atunuu i faigapalota e saili ai tofi o itumalo i le Palemene, ona afea lea o gaioiga e masani ona faia e sui tauva ma tagata palota. O lea ua folasia e le sui Komesina o faigapalota nisi o gaioiga solitulafono ua suesueina e leoleo a o loma le palota tele o le 2016.
Peitai o le afioga Alai‘asa Schwartz Hunt, na tauva i le palota tele o le 2011 ma manumalo i le nofoa e tasi o Anoamaa i Sasae. E tasi le masina talu ona mae‘a ona faatauto ma avea ma faipule aloaia o le Palemene o Samoa, ae aumai le faaiuga a le faamasinoga o faigapalota i le tagi a se tasi o sui sa la tauva i lea palota tele le susuga Moefaauo Lufilufi ua faamaonia ana tuua‘iga ma soloia ai lona filifilia.
Na faamaonia foi ni tuua‘iga a Alai‘asa faasaga i lea sui sa la tauva. O moliaga ia o faatosina solitulafono na faamaonia na mafua ai ona faasala lea tamalii i aiaiga o le Tulafono o Faigapalota ma lē mafai ai ona toe tauva i se palota mo tofi o le Palemene mo le umi e fā tausaga, ma faapena foi ona aveesea ai ma lana aiātatau e avea ai ma tagata palota.
O tagata palota foi e to‘a 29 na molimau e lagolagoina le tetee a Alai‘asa i tuua‘iga o faiga faaalatua na faamaonia foi lo latou aafia i le faatinoga o le moliaga ma faasala ai mo le fā tausaga e lē mafai ona toe avea ai ma tagata palota.
Na ave e lea tamalii le mataupu i le faamasinoga ma faasaga ai lana tagi i le Ofisa o le Komesina o Faigapalota ona na toe talosaga atu i le ofisa e aveese lona suafa mai le lisi o tagata solitulafono o le palota ua mae‘a le taimi o lona faasalaga, ae aumai le mau a le ofisa e lima tausaga le faasalaga e faatoa mae‘a ia Aperila o le tausaga fou 2016.
Peitai na finau lana loia le tamaitai o Rosella Papalii Viane, na faia le faaiuga o Alai‘asa ia Aperila o le tausaga e 2011 a o lei faamamaluina le teuteuga fou o le faasalaga e lima tausaga i le aso muamua o Iuni o le tausaga lava lea.
Sa tutumau pea le ofisa o faigapalota i le lima tausaga ma finau ai loa itu e lua i le faamasinoga ae ina ua manino le ofisa i le tulafono na toe talosaga ai loa i le faamasinoga e faaui mai i tua le latou mau o le lima tausaga.
O le poloaiga a le faamasinoga ua talia ai le finauga a Alai‘asa ma lana loia ma ua mafai ai nei ona toe tauva i le palota tele o le tausaga fou ma avanoa ai foi ona toe avea ma tagata palota, ma ua faapena ona mafai ai ma tagata palota e to‘a 29 sa faasalaina faatasi ma ia.
O le finagalo o le tamalii na ia faamaulalo ai i ona aiga ona o le faasalaga ma le solitulafono na aafia ai. O lona finagalo foi ua ia silafia e lē tatau ona toe faia ni solitulafono e toe aafia ai lona taumafai atu i le palota o le 2016.
“O se lesona lelei foi lenei mo isi sui tauva auā e tusa lava pe lē faia e le sui, ae afai e aafia lana komiti i ni tuua‘iga e mafai ai lava ona toe maumau le taimi atoa sa tapena ai”. Faaalia foi e Alai‘asa o le a matuā aloalo ese ma ni faiga e toe lapelapea ai lona taumafai atu i le tausaga fou mo le toe fia umia o le tofi o le itumalo o Anoamaa i Sasae.
